خۆڵبارین و باران بارین دەستپێدەکاتەوە و کەشناسیش دەڵێت: پلەکانی گەرما لەم یەک دوو رۆژە بەرزدەبنەوە

SNN

ئاسمانی پارێزگاکانی هەرێمی کوردستان لە دوو ڕۆژی داهاتوودا ساماڵ و پەڵەهەور دەبێت و پلەکانی گەرما بەراورد بە ڕۆژانی ڕابردوو بەرزبوونەوەی بەرچاو بەخۆیانەوە دەبینن.

کەشی پێشبینیکراوی ئەمڕۆ یەکشەممە 10-05-2026

بەپێی ڕاپۆرتی بەڕێوەبەرایەتیی گشتیی کەشناسی و بوومەلەرزەزانی، ئاسمانی هەرێم ساماڵ و پەڵەهەور دەبێت و لە ناوچە شاخاوییەکان بۆ نیمچەهەور دەگۆڕێت. خێرایی با لەنێوان 5 بۆ 10 کیلۆمەتر لە کاتژمێرێکدا دەبێت و ئاراستەکەشی بەرەو باکووری ڕۆژهەڵاتە. مەودای بینین لە زۆربەی ناوچەکان 9 بۆ 10 کیلۆمەتر دەبێت و پلەکانی گەرما بەراورد بە دوێنێ 1 بۆ 3 پلەی سیلیزی بەرز دەبنەوە.

پلەکانی گەرمای ئەمڕۆ لە ناوچە جیاوازەکان

بەرزترین پلەکانی گەرمای پێشبینیکراوی ئەمڕۆ بەم شێوەیەیە: لە هەولێر 28، سلێمانی 26، دهۆک 26، هەڵەبجە 27، زاخۆ 27، چەمچەماڵ 27، پیرمام 26، سۆران 25 و حاجی ئۆمەران 18 پلەی سیلیزی دەبێت، هاوکات گەرمیان بە 32 پلە بەرزترین پلەی گەرما تۆمار دەکات.

کەشی پێشبینیکراوی سبەی دووشەممە 11-05-2026

بۆ سبەی دووشەممە، پێشبینی دەکرێت ئاسمانی هەرێمی کوردستان بە ساماڵی و پەڵەهەوری بمێنێتەوە. ئاراستەی با دەگۆڕێت بۆ باکووری ڕۆژئاوا و خێراییەکەشی لەسەرخۆ (5 بۆ 10 کیلۆمەتر لە کاتژمێرێکدا) دەبێت. پلەکانی گەرما بەردەوام دەبن لە بەرزبوونەوە و بەراورد بە ئەمڕۆ 1 بۆ 3 پلەی دیکە زیاد دەکەن.

بەرزترین پلەکانی گەرمای پێشبینیکراو بۆ سبەی

بەپێی پێشبینییەکان، پلەکانی گەرما بۆ ڕۆژی دووشەممە بەم شێوەیەی خوارەوە دەبن: لە هەولێر 30، سلێمانی 28، دهۆک 27، زاخۆ 28، هەڵەبجە 29، چەمچەماڵ 29، پیرمام 28 و سۆران 27 پلەی سیلیزی دەبن. نزمترین پلە لە حاجی ئۆمەران دەبێت کە 20 پلەیە و گەرمیان بە 34 پلەی سیلیزی گەرمترین ناوچەی هەرێم دەبێت.

خۆڵبارین دەستپێدەکاتەوە

ئاراس جەبار، شارەزای بواری کەشناسی رایگەیاندووە، لە ڕۆژانی 12 و 13ی ئەم مانگەدا، بەهۆی هاتنی هەوایەکی گەرم لە باشوورەوە و تێکەڵبوونی لەگەڵ حەوزێکی ساردی سەرەوە، ئەگەری دروستبوونی هەورەبرووسکەی وشک یان نمەباران لە چەند ناوچەیەکی جیاجیا هەیە. ئاماژەی بەوەشکردووە کە لەو دوو ڕۆژەدا کەشێکی گەرم باڵادەست دەبێت و تا کۆتایی ئەم هەفتەیە دەمێنێتەوە.

سەبارەت بە قۆناغی دووەمی گۆڕانکارییەکان، ئەو کەشناسە ڕوونیکردووەتەوە، لە سەرەتای هەفتەی داهاتوو و لە 16ی مانگەوە، بارستە هەوایەکی فێنک لە دەریای ناوەڕاستەوە ڕوو لە ناوچەکە دەکات. لەم قۆناغەدا پلەکانی گەرما نزم دەبنەوە و کەشوهەوا ناسەقامگیر دەبێت، کە ئەگەری دروستبوونی تاوەبارانی مامناوەند و هەورەبرووسکەی چالاکی لێدەکەوێتەوە و لە هەندێک شوێنیش بڕی بارانەکە زیاتر دەبێت.

لە بەشێکی دیکەی پێشبینییەکانیدا هۆشداری داوە لە دروستبوونی خۆڵبارین لەگەڵ شەپۆلە فێنکەکەدا و دەڵێت: “بەهۆی ئەوەی هەواکە ساردە و پێشتر ناوچەکە گەرم بووە، تێپەڕبوونی ئەو بارستە هەوایە بەسەر ڕووە گەرمەکاندا دەبێتە هۆی خێرابوونی با و بەرزبوونەوەی تۆز و خۆڵ لە بیابانەکانی ڕۆژئاوای عێراقەوە بە ئاراستەی ناوچەکانمان.”