نەوزاد شێخ كامیل:بەو بڕە گەنمە ڕازی نین كە بڕیارە حكومەتی عێراق لێمان وەربگرێت

عەلی حەمە سەعید-SNN

بەڕێوەبەری گشتیی بازرگانی لە وەزارەتی بازرگانی و پیشەسازی حكومەتی هەرێم ئاماژە بەوەدەكات، لەگەڵ ئەوەی وەزارەتی بازرگانی عێراق بڕیاریداوە كە بۆ ئەمساڵ 400 هەزار تۆن گەنم لە جوتیارانی هەرێم وەربگرێت، بەڵام ئێمە بەو بڕە ڕازی نابین، چونكە بەرهەمی ئەمساڵی گەنمی جووتیان دەگاتە دوو ملیۆن تۆن گەنم.

نەوزاد شێخخ كامیل، بەڕێوەبەری گشتی بازرگانی هەرێم لە وەزارەتی بازرگانی و پیشەشازیی حكومەتی هەرێم بە SNNی راگەیاند: هەرچەندە عێراق بڕی وەرگیراوی گەنمی جووتیارانی هەرێمی كردووە بە 400 هەزار تۆن بۆ ئەمساڵ، بەڵام ئێمە بەو بڕە رازی نین چونكە زیاتر لە سێ ملیۆن دۆنم زەوی داچێندراوە و بەرهەممان ئەمساڵ زیاد دەكات.

ئاماژەی بەوەشكرد، ئێمە بڕیارەكەی حكوومەتی عێراقیمان بۆ وەرگرتنی ئەو بڕە گەنمە ڕەتكردووەتەوە كە ناكاتە لە 25% ی ئەو بەرهەمەی جووتیارانی هەرێمی كوردستان هەیانە، بۆیە بە نووسراوێكی فەرمی سەرۆكایەتییەكانی عێراق و نوێنەرانی كورد لە بەغدا ئاگادار كراونەتەوە بۆ ئەوەی ئاگادار بن لەو ستەمەی لە جووتیارانی كورد دەكرێت.

بەڕێوەبەری گشتی بازرگانی هەرێم لە وەزارەتی بازرگانی و پیشەشازیی حكومەتی هەرێم ئەوەشی خستەڕوو، ئەمساڵ بەهۆی زۆری بارانبارین، رێژەی بەرهەمی گەنم لە چاو ساڵانی رابردوو زۆر زیاترە، بەجۆرێك بەرهەمی ئەمساڵی گەنمی جووتیارانی هەرێمی كوردستان زیاترە لە دوو ملیۆن تۆن، بۆیە داوامان لە بەغدا كردووە 50% بەرهەمەكە وەربگرێت.