وەزارەتی ناوخۆ ژمارەیەك بڕیار و ڕێکاری نوێ بۆ پاراستنی ژینگەی کوردستان دەردەكات

SNN-

وەزارەتی ناوخۆی حکومەتی هەرێمی کوردستان، ژمارەیەك بڕیار و ڕێکاری نوێی بۆ پاراستنی سروشتی کوردستان دەرکرد کە تێیدا جەخت لە چالاککردنی ئەنجومەنی ژینگە و گۆڕینی نایلۆن بۆ کاغەز، سەپاندنی سزای دارایی تا بڕی 8 ملیۆن دینار بەسەر سەرپێچیکاران دەکاتەوە؛ جگە لەمانەش، بڕیارەکە ڕێگری توند لە هەر جۆرە زێدەڕۆییەک بۆ سەر موڵکی گشتی و دارستانەکان دەکات و سوتاندنی پەرێزی کێڵگەکان دوای دروێنە قەدەغە دەکات.
ستراتیژییەکی گشتگیر و واژۆی وەزیری ناوخۆ

ئەمڕۆ سێشەممە، 12ـی ئایاری 2026، رێبەر ئەحمەد، وەزیری ناوخۆ، ژمارەیەک بڕیاری ئاراستەی دامەزراوەکان کرد، کە دوای زنجیرەیەک کۆبوونەوەی فراوانی نێوان وەزارەتی ناوخۆ، وەزارەتی کشتوکاڵ، دەستەی ژینگە و پارێزگارەکان داڕێژراون.

پوختەی بڕیارەکان و سزاکانی وەزارەتی ناوخۆ:

1. جێگرتنەوەی نایلۆن بە کاغەز: هاندانی بەکارهێنانی کاغەز لەبری نایلۆن و شوشە لە پێداویستییە ڕۆژانەکاندا و پاڵپشتیکردنی کارگەکانی بەرهەمهێنانی کاغەز.

2. چاودێری و سزادان: چاودێریکردنی توندی جێبەجێکردنی ڕێنماییە ژینگەییەکان بە هەماهەنگی لەگەڵ هێزەکانی ئاسایشی ناوخۆ و سزادانی سەرپێچیکاران.

3. سزای دارایی تا 8 ملیۆن: پێدانی دەسەڵات بە فەرمانگەکانی ژینگە بۆ سەپاندنی سزای دارایی تا بڕی (8,000,000) هەشت ملیۆن دینار بەسەر سەرپێچیکاراندا.

4. تیمی گەڕۆک لە شوێنە گەشتیارییەکان: پێکهێنانی تیمی هاوبەش لە (پۆلیس، ئاسایش، پۆلیسی دارستان و ژینگە) بۆ سزادانی ڕاستەوخۆی ئەو کەسانەی ژینگە پیس دەکەن.

5. فراوانکردنی لیژنەکان: زیادکردنی نوێنەرانی وەزارەتی کشتوکاڵ و بەڕێوەبەرایەتی وەڵامدانەوەی قەیرانەکان بۆ ناو لیژنەکانی پاراستنی ژینگە.

6. کۆبوونەوەی مانگانە: ڕاسپاردنی پارێزگار و سەرپەرشتیاران بۆ ئەنجامدانی کۆبوونەوەی مانگانە و چڕکردنەوەی هەڵمەتەکانی هۆشیاری.

7. لابردنی زێدەڕۆیی: پێکهێنانی لیژنەی تایبەتمەند بۆ ڕێگری و لابردنی هەر جۆرە زێدەڕۆییەک بۆ سەر موڵکی دەوڵەت، دارستان و سەرچاوەکانی ئاو.

8. قەدەغەکردنی سووتاندنی پەرێز: قەدەغەکردنی سووتاندنی پاشماوەی کشتوکاڵی و پەرێز دوای وەرزی دروێنە بە مەبەستی ڕێگری لە کەوتنەوەی ئاگر.

9. ڕۆڵی ڕاگەیاندن: ڕاسپاردنی دامەزراوە میدیاییەکان بۆ بڵاوکردنەوەی هۆشیاری ژینگەیی و ئاشناکردنی هاووڵاتییان بە یاسا و سزاکان.