سەدان هەزار دۆلار بۆ ڕاوێژکارێک؛ پەردە لەسەر گرێبەستێکی گرانبەهای حکومەتی هەرێم و مەجید گلی لادەدرێت

SNN – بەشی هەواڵ

وینسرۆپ ڕۆجەرز، ڕۆژنامەنووسی بنکۆڵکاری ئەمریکی، بەڵگەنامەی گرێبەستێکی دارایی گەورەی نێوان حکومەتی هەرێمی کوردستان و مەجید گلی، پەیامنێری پێشووی کەناڵی ڕووداو لە نەتەوە یەکگرتووەکانی بڵاوکردەوە، کە تێیدا بڕی پارەیەکی خەیاڵی بۆ ناوبراو تەرخان کراوە.

وردەکارییە داراییەکانی گرێبەستەکە:
بەپێی ئەو بەڵگەنامانەی ڕۆجەرز بڵاوی کردوونەتەوە، گرێبەستەکە لەلایەن شەعبان شەعبان چالی، سەرۆکی نووسینگەی مەسرور بارزانی واژۆ کراوە و بڕی پارەکان بەم شێوەیەیە:

مووچەی مانگانە: $16,500 وەک مووچەی بنەڕەتی.

خەرجییەکان (Expenses): $10,000 دۆلاری مانگانە.

کۆی گشتی مانگانە: $26,500.

تێچووی ساڵانە: $318,000.

کۆی گشتی بۆ 4 ساڵ: $1,272,000.

پۆست و ناسنامەی یاسایی:
مەجید گلی، کە لە بەڵگەنامەکاندا بە ناوی (عەبدولمەجید عەبدولمەجید) هاتووە، وەک “ڕاوێژکاری تایبەت بۆ کاروباری نێودەوڵەتی” لە چوارچێوەی ڕێکخراوێک بە ناوی “کۆمیتەی کوردیی ئەمریکی – AKC” کار دەکات. ئەم کۆمیتەیە لە ساڵی 2024دا بە فەرمی لە وەزارەتی دادی ئەمریکا وەک “بریکاری بیانی” (FARA) بۆ پاراستنی بەرژەوەندییەکانی حکومەتی هەرێم تۆمار کراوە.

ئامانج و چالاکییەکان:
ڕۆجەرز ئاماژە بەوە دەکات کە ئامانجی ڕاگەیەندراوی کۆمیتەکە “بەرزکردنەوەی ئاستی هۆشیارییە دەربارەی هەرێم لە ئەمریکا”، بەڵام چالاکییەکانی ناڕوونن. ناوبراو ئاماژەی بەوەش کردووە کە مەجید گلی پێشتر لە میدیا ڕاستڕەوەکانی ئەمریکا وەک “Fox News” وتاری بڵاوکردووەتەوە و تێیدا پشتیوانی لە توندکردنەوەی فشارەکان دژی ئێران و گروپە پرۆکسییەکانی لە ناوچەکەدا کردووە.