مەرجی ناردنی مووچە لە پێش جەژندا ئاشکرابوو

بە وتەی بەرپرسانی كورد لە بەغدا، وەزیری نوێی دارایی ئامادەیە پێش جەژن مووچەی مووچەخۆرانی هەرێم بنێرێت بەو مەرجەی دوای جەژن هەرێمی كوردستان پشكی تەواوی فیدڕاڵی لە داهاتی نانەوتی (120 ملیارەكە) ڕادەست بكات.

ئەمڕۆ هەینی 22ی ئایار، بەرپرسێکی باڵای وەزارەتی دارایی عێراق بۆ میدیا عێراقیەکان ڕایگەیاند، وەزیری دارایی عێراق، دڵنیایی داوە کە بەر لە هاتنی جەژن مووچەی سەرجەم فەرمانبەرانی عێراق و هەرێمی کوردستانیش دابەش دەکرێت.

ئاماژەی بەوەکردووە، کە ئەگەر تاوەکو ڕۆژی دوو شەممە کێشەی نەختینە (کاش) دروست نەبێت، پارەی مووچەی هەرێم خەرج دەکرێت و پرسی داهاتی نانەوتی نابێتە ڕێگر، بەڵکو دوای جەژن کۆی ئەو داهاتە ناوخۆییەی لە هەرێم کۆکراوەتەوە، وەردەگیرێت.

هاوکات، شاندێکی تەکنیکی وەزارەتی دارایی هەرێمی کوردستان بە مەبەستی یەکلاکردنەوەی وردەکارییەکان سەردانی بەغدای کردبوو و ئێوارەی ئەمڕۆ گەڕایەوە.

عەبدوڵڵا ڕەمەزان، سەرۆکی شاندەکە ڕایگەیاند:”هیچ گرفتێکمان نییە و هەموو شتێک حازرە. ئەگەر وەزارەتی دارایی عێراق ڕۆژانی هەینی و شەممە دەوام بکەن، ڕەنگە هەفتەی داهاتوو مووچەی هەرێمی کوردستانیش بدرێت.”