سلێمانی
SNN-
بەگوێرەی ئامارەکانی پێگەی شەفافییەت، داهاتی نانەوتیی پارێزگای سلێمانی و دەوروبەری لە سێ هەفتەی یەکەمی مانگی ئایاردا پاشەکشەی کردووە و بەراورد بە مانگی نیسان زیاتر لە 6 ملیار دینار کەمی کردووە.
بەراوردکردنی داهاتی نیسان و ئایار
لە سێ هەفتەی یەکەمی مانگی ئایاردا، کۆی داهاتی نانەوتیی پارێزگاکانی سلێمانی، هەڵەبجە و ئیدارە سەربەخۆکانی گەرمیان و ڕاپەڕین گەیشتووەتە 27,364,000,000 دینار. ئەم بڕە بەراورد بە هەمان ماوەی مانگی نیسان، کە داهاتەکەی 33,594,000,000 دینار بووە، بە ڕێژەی 19% کەمی کردووە.
وردەکاریی شێوازی کۆکردنەوەی داهات
لە داهاتی سێ هەفتەی یەکەمی مانگی ئایار، بڕی 26,599,000,000 دیناری بەشێوەی کاش بووە، 757,000,000 دینار بە چەک و تەنیا 7,000,000 دیناریشی بە مەقاسە بووە. بۆ بەراوردکردن، لە سێ هەفتەی یەکەمی مانگی نیساندا بڕی کاش 28,291,000,000 دینار بووە، بڕی چەک 5,154,000,000 دینار و بڕی مەقاسەش 148,000,000 دینار بووە.
سەرچاوەی داتاکان و پڕۆسەی تۆمارکردن
ئەم داتایانە لە ڕێگەی 6 گەنجینە، 28 وەزارەت و دەستە، لەگەڵ سەدان بەڕێوەبەرایەتی جیاواز کۆدەکرێنەوە. ڕۆژانە تیمێکی تایبەت کە لە 828 فەرمانبەر پێکهاتوون، وردەکاریی داهاتەکان لە پێگەی شەفافییەت تۆمار دەکەن تاوەکو جموجۆڵە داراییەکان بۆ ڕایگشتی ڕوون بن.
پڕۆژەی شەفافییەت و ئامانجەکەی
پڕۆژەی شەفافییەت بۆ چاودێریکردنی جموجۆڵە داراییەکان لە تەممووزی 2022ـەوە بە بڕیاری قوباد تاڵەبانی، جێگری سەرۆکوەزیرانی هەرێمی کوردستان دەستی پێکردووە. ئەم پڕۆژەیە وەک سیستمێکی ئەلیکترۆنی کار دەکات بۆ خستنەڕووی داهاتە نانەوتییەکانی سنووری سلێمانی، هەڵەبجە، گەرمیان و ڕاپەڕین.
