کەشناسێک: سبەی یەکشەممە وەرزی هاوین بە درێژترین ڕۆژی ساڵ دەست پێدەکات

SNN

سالار حاجی عەلی، شارەزای بواری کەشناسی ڕایگەیاند کە سبەی یەکشەممە، 21ی حوزەیرانی 2026، کاتژمێر 11:24ی پێش نیوەڕۆ بە کاتی هەرێمی کوردستان، وەرزی هاوین بە فەرمی دەست پێدەکات. لەم کاتەدا خۆر ڕاستەوخۆ لەسەر خولی قڕژاڵ (هێڵی گەورەی باکووری زەوی) دەدرەوشێتەوە، کە بەهۆیەوە درێژترین ڕۆژی ساڵ تۆمار دەکرێت.

ماوەی ڕۆژەکە لە عێراق و هەرێمی کوردستاندا دەگاتە 14 کاتژمێر و 8 خولەک؛ بە شێوەیەک خۆر لە کاتژمێر 4:46ی بەیانی هەڵدێت و لە کاتژمێر 18:55ی ئێوارەدا ئاوا دەبێت. دوای ئەم ڕێکەوتەش، ڕۆژەکان وردە وردە کورت دەبنەوە تا دەگاتە 23ی ئەیلولی 2026، کە تێیدا لە کاتژمێر 3:05ی بەیانی وەرزی هاوین کۆتایی دێت و پاییز دەست پێدەکات.

بەم شێوەیە، ماوەی هاوینی ئەمساڵ نزیکەی 93 ڕۆژ و 15 کاتژمێر دەبێت، کە درێژترین وەرزی ساڵە. شیکاریی وردی ئەم ماوەیە بە کاتژمێر، خولەک و چرکە بەم شێوەیەیە:

2,247 کاتژمێر

134,820 خولەک

8,089,200 چرکە

سەبارەت بە دۆخی کەشوهەوا، ئەو شارەزایە ئاماژەی بەوە کرد کە پلەکانی گەرما لە مانگەکانی تەمموز و ئابدا بە شێوەیەکی بەرچاو بەرز دەبنەوە و لە ناوچەکانی گەرمیان و کەرکوکدا دەگەنە نزیکەی 48 پلەی سەدی، و زۆرجار لەوەش زیاتر دەبن. کەشوهەوا بە گشتی گەرم و وشک دەبێت، هەرچەندە هەندێک جار بەهۆی شێدارییەوە پەڵەهەور دروست دەبن.

لە کۆتاییدا، ناوبراو هۆشداری دا کە ئەم شەپۆلی گەرمایە کاریگەریی ڕاستەوخۆی لەسەر سەرچاوەکانی ئاو، کشتوکاڵ و ژیانی ڕۆژانە دەبێت، بۆیە پاراستنی ئاو و بەکارهێنانی ڕێگای نوێی ئاودێری هێندەی تر پێویست دەبێت. لە هەمان کاتدا، ناوچە شاخاوییەکان وەک شوێنێکی فێنک و گونجاو بۆ گەشتوگوزار و ڕاکردن لە گەرمای هاوین دەمێننەوە.

جێی ئاماژەیە، لە کاتێکدا هاوین لە نیوەگۆی باکوور دەست پێدەکات، لە هەمان ڕۆژی 21ی حوزەیراندا لە کیشوەری باشووری ئەفریقا، ئەمریکای باشوور و ئوسترالیا وەرزی زستان دەست پێدەکات، چونکە وەرزەکان لە نیوەگۆی باکوور و باشووری زەویدا بە تەواوی پێچەوانەی یەکترن.