دوای دەستگیركردنی خورشید هەركی، پارتی قەزای خەباتی كردووەتە سەربازگە و هێزێكی زۆر بڵاوەی پێكراوە

عەلی حەمە سەعید-SNN

دوای دەستگیركردنی خورشید هەركی و براكەی بە تۆمەتی نانەوەی پشێوی و كوشتنی كەسێك و كاری ئاژەوەگێڕی، هێزە ئەمنییەكانی پارتی لە قەزای خەبات بڵاوەیان پێكراوە و چەندین جۆر چەكی قورس و سوكیان هێناوەتە گەڕەك و شوێنی نزیك لەمانەوەی خورشید هەركی، ئەوەش لە ترسی ئەنجامدانی خۆپیشاندانی هاووڵاتیان.

بەگوێرەی ئەو زانیارییانەی كە دەست SNNكەوتوون، لە ئێستادا هێزێكی ئەمنی زۆر لە دەرەوەی قەزای خەباتەوە هێندراونەتە گەڕەك و كوچە و كۆڵانەكانی خەبات، ئەوەش لە ترسی ئەنجامدانی خۆپیشاندانی هاووڵاتیانە بۆ دەربڕینی نیگەرانی لەدەستگیركردنی خورشید هەركی و براكەی.

ئاماژە بەوەشكراوە، هێزە ئەمنییەكانی پارتی، چەكی قورس و سوك و ئۆتۆمبێلی گەورەی سەربازییان هێناوەتە قەزای خەبات بۆ ئەوەی لەحاڵەتی ئەنجامدانی خۆپیشاندان بتوانن سەركوتی خۆپیشاندەران بكەن، هاوكات خزمان و دۆستانی هەركی بەتایبەت خورشید هەركی لە چاوەروانی ئەوەدان ناوبراو ئازاد بكرێت  بەپێچەوانەوە كاردانەوەیان دەبێت.

ئەوەش لەكاتێكدایە كە بەیانی ئەمڕۆ ئاسایشی هەولێر بڵاویكردەوە كە هەریەكە لە خورشید هەركی و حەیدەرهەركی برای دەستگیركراون، ئەو دوو تاوانبارە كاریان بۆ هاندانی خەڵك دژی یاسا و سەقامگیریی گشتی، رێگریكردن لەپڕۆژە حكومییەكان و هەڕەشەكردن لەتێكدانی ژێرخانی ئابووری لەشوێنە جیاجیاكانی قەزای خەبات كردووە.پۆلیسی هەولێر تەئكید لەوە دەكاتەوە كە لە ماوەی داهاتوودا هەردوو تاوانبار لەسەر ئەو تاوانانەی دراونەتە پاڵیان، رووبەڕووی دادگا دەكرێنەوە .