لە کاتی بەخاکسپاردنی تەرمی خامنەییدا تەقە لە بەشداربووان کرا و کوژراو و بریندار هەیە

SNN-

لە دوایین ساتەکانی بەڕێوەچوونی ڕێوڕەسمی بەخاکسپاردنی تەرمی عەلی خامنەیی، ڕێبەری پێشووی کۆماری ئیسلامیی ئێران لە شاری مەشهەد، ڕووداوێکی تەقەکردن لە نزیک بازگەیەکی ئەمنی ڕوویدا و بەهۆیەوە چەند کەسێک بوونە قوربانی.

بەرەبەیانی ئەمڕۆ هەینی 10-07-2026، لە نزیک مەزارگەی ئیمام ڕەزا لە شاری مەشهەد، چەند چەکدارێکی نەناسراو کە جلوبەرگی سەربازییان لەبەردا بووە و گومانیان لێنەکراوە، تەقەیان لە بەشداربووانی ڕێوڕەسمەکە کردووە.

ئەمیروڵڵا شەمقەدری، جێگری پارێزگاری خوڕاسانی ڕەزەوی، ڕووداوی تەقەکردنەکەی پشتڕاستکردەوە و ڕایگەیاند، لانیکەم 2 کەس لەو هێرشەدا کوژراون. ئاماژەی بەوەش کرد کە تاوەکو تێستا هیچ کەسێک لەسەر ڕووداوەکە دەستگیرنەکراوە، بەڵام هێزە ئەمنییەکان سەرقاڵی لێکۆڵینەوەی وردن بۆ ناسنامەی تەقەکەرەکان و دەستگیرکردنیان.

کوژراوەکان ئەندامی بەسیجن

هەرچەندە تا ئێستا بە فەرمی ناسنامەی قوربانییان ڕانەگەیەندراوە، بەڵام سەرچاوە میدیاییەکان ئاشکرایان کردووە کە هێرشەکە لە نزیک بازگەیەک بووە و تێیدا 2 ئەندامی هێزەکانی “بەسیج” کوژراون و چەند کەسێکی دیکەش بریندار بوون.

ئەم ڕووداوە لە کاتێکدایە، لە رۆژی 28ی شوباتی 2026 و لە سەرەتای دەستپێکی جەنگی نێوان (ئەمریکا و ئیسرائیل) لە دژی ئێران، عەلی خامنەیی لە هێرشێکدا بۆ سەر نووسینگەکەی لە تاران کوژرا. دوای تێپەڕبوونی 131 ڕۆژ بەسەر کوژرانەکەیدا، بەرەبەیانی ئەمڕۆ تەرمەکەی لە مەزارگەی ئیمام ڕەزا لە مەشهەد بەخاکسپێردرا.