عێراقچی:کردنەوەی گەرووی هورمز مەرجدارە بە پابەندبوونی ئەمریکا بە چەندمەرجێکەوە

SNN-

عەباس عێراقچی، وەزیری دەرەوەی ئێران، لە چاوپێکەوتنێکدا لەگەڵ ڕۆژنامەی “شهرآرانیوز” ڕایگەیاند کە وڵاتەکەی هێشتا هیچ بڕیارێکی لەبارەی دەستپێکردنەوەی دانوستانەکان لەگەڵ ویلایەتە یەکگرتووەکانی ئەمریکادا نەداوە، و جەختیشی کردەوە کە ئەو پەیامانەی لە ڕێگەی قەتەر و پاکستانەوە ئاڵوگۆڕ دەکرێن، بە هیچ شێوەیەک بە “دانوستان” دانانرێن.

وەزیری دەرەوەی ئێران لەبارەی دۆسیە جیاوازەکان و پەیوەندییە دیپلۆماسییەکانەوە چەند خاڵێکی خستە ڕوو:

دانوستان لەگەڵ عومان

عێراقچی ڕوونی کردەوە کە دانوستانەکانیان لەگەڵ سەلتەنەی عومان جیاوازن و تەنها تایبەتن بە دیاریکردنی هێڵێکی دەریایی لە ڕێگەی گەرووی هورمزەوە، جەختیشی کردەوە کە پێویستە ئەمریکا مەرجە پێویستەکان جێبەجێ بکات بۆ دەستپێکردنەوەی جووڵەی کەشتیوانی لەو ڕێگەیەدا.

پێشێلکارییەکانی ئەمریکا

ناوبراو ئاماژەی بەوە دا کە ئەوەی لە یاداشتی لێکتێگەیشتنی ئیسلامئاباددا هاتبوو، بریتی بوو لە کۆتاییهێنان بە جەنگ، بەڵام ویلایەتە یەکگرتووەکان ئەو یاداشتەی پێشێل کردووە و دووبارە پێکدادانەکانی دەستپێکردووەتەوە.

دۆخی نوێی ناوچەکە

سەبارەت بە پرسی ئاگربەست، ڕاشیگەیاند: “ئێمە شتێکمان نەبووە بە ناوی ئاگربەست تاوەکو ئێستا درێژ بکرێتەوە، بەڵکو ئەوە کۆتاییهێنان بوو بە جەنگ، ئێستاش دۆخێکی نوێ هاتووەتە ئاراوە.”

پەیامی نێوەندگیرەکان

لە کۆتاییدا دووپاتیکردەوە کە سەرەڕای ئاڵوگۆڕکردنی پەیام لەلایەن نێوەندگیرەکانەوە (چ قەتەر بن یان پاکستان)، بەڵام ئەم پەیوەندییانە بە هیچ جۆرێک مانای بوونی دانوستان ناگەیەنن.