چوارسەرپێچیكاری ژینگە دەستگیركران

SNN-عەلی حەمە سەعید

وتەبێژی پۆلیسی دارستان و ژینگەی هەڵەبجە ئاماژە بەوەدەكات لەلایەن هێزەكانی ئاسایشەوە چواركەسمان ڕادەستكراوە كەدەستگیركراون هەستاون بەبڕینەوەی ژمارەیەك داری تەڕ لە نزیك ناحییەی خورماڵ، بە بەڕێوەبەری ناحیەیان وتووە مۆڵەتمان پێبدە دەچین داری وشك دەبڕین.

ملازم فەرمان عومەر، وتەبێژی بەڕێوەبەرایەتی پۆلیسی دارستان و ژینگەی هەڵەبجە بە SNNی راگەیاند: دوای ئەوەی ژمارەیەك هاووڵاتی دەچنە لای بەڕێوەبەری ناحییەی خورماڵ داوای مۆڵەتی لێدەكەن كە بتوانن لە نزیك گوندی (كوڵكنی) ژمارەیەك داری وشك ببڕنەوە، بەڕێوەبەری ناحیەش مۆڵەتیان پێدەدات، بەڵام ئەو كەسانە لە بری بڕینەوەی داری وشك هەستاون بە بڕینەوەی ژمارەیەك داری تەڕ.

ئاماژەی بەوەشكرد، دوای ئەوەی لەلایەن ئاسایشەوە بە كارەكەیان دەزاندرێت هەر چواركەسەكەیان دەستگیردەكرێن و ئەوانیش رادەستی ئێمەیانكردن، هاوكات پەڕاوی لێكۆڵینەوەمان بۆ كردوونەتەوە و ئاراستەی دادگامان كردوون بۆ بە سزا گەیاندنیان.

وتەبێژەكەی پۆلیسی دارستان و ژینگەی هەڵەبجە ئەوەشی خستەڕوو، بڕیاری جۆری سزادان لەلایەن دادوەرەوە دەر دەكرێت، ئاخۆ بەند دەكرێن یاخود بە پێبژاردن سزای مادییان بەسەردا دەسەپێنێت و ناچاریان ەكات بە ناشتنەوەی ژمارەی ئەو دارانەی كە بڕیویانن.