دۆناڵد ترەمپ و ئیلۆن مەسک
SNN
واشنتن باڵاترین مەدالیای زانستی و تەکنەلۆجی دەبەخشێتە گەورە داھێنەرانی جیهان؛ دۆناڵد ترەمپ لە کۆشکی سپی رێز لە ئیلۆن مەسک و سەرکردەکانی تری کەرتی تەکنەلۆجیا دەنێت و کەرتی ژیریی دەستکردیش وەک کۆڵەکەی “سەردەمی زێڕین”ی ئابووریی وڵاتەکەی دەناسێنێت.
رێوڕەسمی بەخشینی مەدالیای نیشتمانیی زانست
کۆشکی سپی رایگەیاند، دۆناڵد ترەمپ سەرۆکی ئەمریکا لە لووتکەی “زانست: سەردەمێکی زێڕینی نوێ” باڵاترین خەڵاتی زانستیی وڵاتەکەی پێشکەش بە ژمارەیەک لە سەرکردە دیارەکانی کەرتی تەکنەلۆجیا دەکات. لەو چوارچێوەیەدا، هەریەک لە سێرگی برین هاودامەزرێنەری گووگڵ، جێنسن هوانگ بەڕێوەبەری جێبەجێکاری ئێنڤیدیا، و لیزا سوو سەرۆکی کۆمپانیای ئەی ئێم دی، “مەدالیای نیشتمانیی زانست” لەلایەن سەرۆکی ئەمریکاوە وەردەگرن.
مەدالیای نیشتمانی بۆ تەکنەلۆجیا و داهێنان
هاوکات لە بەشێکی دیکەی رێوڕەسمەکەدا، مایکڵ دێڵ خاوەنی کۆمپانیای دێڵ، لەگەڵ ساتیا نادێلا بەڕێوەبەری جێبەجێکاری کۆمپانیای مایکرۆسۆفت، “مەدالیای نیشتمانی بۆ تەکنەلۆجیا و داهێنان”یان پێدەبەخشرێت، کە ئەمەش بەرزترین و باڵاترین خەڵاتی فەرمیی ویلایەتە یەکگرتووەکانی ئەمریکایە لە بواری داهێنان و تەکنەلۆجیادا.
پێگەی زانایان لە دیدی ئیدارەی ترەمپەوە
لیز هیوستن، گوتەبێژی کۆشکی سپی لە راگەیێندراوێکدا سوپاسگوزاریی ئیدارەی ترەمپی بۆ بەشداری و خزمەتی ئەم سەرکردە ناوازانە لە بوارەکانی زانست و تەکنەلۆجیادا دەربڕی. گوتەبێژەکەی کۆشکی سپی روونیکردەوە کە ئەو کەسانەی خەڵاتەکە وەردەگرن، رۆڵی سەرەکی دەبینن لە دەستەبەرکردنی ئەوەی ئەمریکا هەمیشە بە پێشەنگی جیهان لە بواری داهێناندا بمێنێتەوە.
ئاساییبوونەوەی پەیوەندییەکانی ترەمپ و ئیلۆن مەسک
ئیلۆن مەسک، خاوەنی کۆمپانیاکانی سپەیس ئێکس و تێسلا کە گەورەترین بەخشەری دارایی کەمپەینی هەڵبژاردنی ترەمپ بوو لە ساڵی 2024دا، پەیوەندییەکانی لەگەڵ سەرۆکی ئەمریکا ئاسایی بوونەتەوە، دوای ئەوەی ساڵی رابردوو بەهۆی سەرۆکایەتیکردنی فەرمانگەی کەمکردنەوەی خەرجییەکانی حکومەت گرژی کەوتبووە نێوانیان. مەسک و هوانگ مانگی رابردوو لە ئێوارەخوانی ترەمپ بۆ شی جینپینگ سەرۆکی چین لە کۆشکی سپی ئامادە بوون، هەروەها هەفتەی رابردووش لەگەڵ گەورە بەرپرسانی تەکنەلۆجیا بەڵێنیاندا چاودێریی مەترسییەکانی ژیریی دەستکرد بکەن.
ژیریی دەستکرد؛ کۆڵەکەی سەردەمی زێڕینی ئابووری
سەرۆکی ئەمریکا سەرجەم ئەو هۆشدارییانە رەتدەکاتەوە کە باس لەوە دەکەن گوایە ژیریی دەستکرد مەترسی بۆ سەر مانەوەی مرۆڤایەتی دروست دەکات. بە پێچەوانەوە، ترەمپ جەخت لەوە دەکاتەوە کە ئەم کەرتە ژێرخان و کۆڵەکەی سەرەکییە بۆ دروستکردنی ئەو قۆناغەی ناوی ناوە “سەردەمی زێڕین” لە گەشەی ئابووریی ئەمریکا لە ماوەی خولی دووەمی سەرۆکایەتییدا.
ئاڵنگارییەکانی هەڵبژاردنی نیوەخولی کۆنگرێس
ئەم رێوڕەسمە لە کاتێکدا ساز دەکرێت کە پارتی کۆماری لەبەردەم مەترسیی لەدەستدانی زۆرینەی کورسییەکانی کۆنگرێسدایە لە هەڵبژاردنەکانی نیوەخول لە مانگی داهاتوودا. ئەم دۆخە سیاسییەش بەهۆی نیگەرانی و ناڕەزایەتیی دەنگدەرانی ئەمریکاوە دروست بووە بەرامبەر بە ئەگەری هەڵگیرسانی جەنگ لە دژی ئێران و بەرزبوونەوەی رێژەی هەڵاوسان و گرانی لە وڵاتەکەدا.
