مامەڵەی بە هەمیشەیی کردنی مامۆستایانی گرێبەست لە ڕانیە دەستپێدەکات

SNN – محەمەد مستەفا

سبەی چوارشەممە، لە سنووری قەزای ڕانیە مامەڵەی بە هەمیشەیی کردنی مامۆستایانی گرێبەست دەستپێدەکات.

یوسف ناودەشتی، بەرپرسی راگەیاندنی پەروەردەی ڕانیە بە (SNN)ی راگەیاند: “سبەی لە پەروەردەی ڕانیە مامەڵەی بە هەمیشەیی کردنی مامۆستایانی گرێبەست دەستپێدەکات و لە قۆناغی یەکەمی پڕۆسەکەش مامەڵەی سەرجەم مامۆستایانی گرێبەستی قۆناغی بنەڕەتی جێبەجێدەکرێت”.

وتیشی: “داوا لە مامۆستایانی گرێبەستی قۆناغی بنەڕەتی سنووری قەزای ڕانیە دەکەین کە سبەی چوارشەممە کاتژمێر 9:00ى  بەیانی سەردانی پەروەردەی ڕانیە بکەن بۆ ئەو مەبەستە، بەڵام بە رەچاوکردنی رێنماییە تەندروستییەکان”.

بەرپرسی راگەیاندنی پەروەردەی ڕانیە باسی لەوەشکرد: “پێویستە مامۆستایانی گرێبەست لەکاتی سەردانیکردنی پەروەردەی ڕانیە ئەم پێداویستیانە لەگەڵ خۆیاندا بهێنن: کارتی نیشتمانی یان پێناسی باری شارستانی و کارتی زانیاری و فۆرمی خۆراک و کۆپیەکانییان و چوار وێنەی رەنگاو رەنگ”.

ئه‌و به‌رپرسه‌ى په‌روه‌رده‌ى ڕانیه‌ ئه‌وه‌شى خسته‌ڕوو: “هەفتەی ئایندە مامۆستایانی گرێبەستی ئامادەیی بۆ رایکردنی مامەڵەی بوون بە هەمیشەییان ئاگادار دەکرێنەوە”.