کاکەییەکانی هەڵەبجە بۆ حکومەت: مەهێڵن چیتر ببینە قوربانی

SNN-عەلی حەمە سەعید

پێش نیوەڕۆی ئەمڕۆ كاكەییەكانی دانیشتووی پارێزگای هەڵەبجە گردبوونەوەیەكی ناڕەزایەتیان دژ بە رەوشی ئەمنی کاکەییەکانی ناوچە جێناکۆکەکان و هێرشی ناوبەناوی داعش بۆ سەریان ئەنجامدا و داوایەکیان ئاڕاستەی هەرێم و بەغدا کرد.

ڕەنگین سەلام، بەناوی كاكەییەكانی دانیشتووی پارێزگای هەڵەبجەوە لە كۆنگرەیەکی رۆژنامەوانیدا رایگەیاند: “لەگەڵ سەرهەڵدانی چەكدارانی داعش لە ناوچە جێناکۆکەکان. ژیانی كاكەییەكان هەر لە پارێزگای موسڵ تا دیالە و دەوروبەری کەوتووەتە مەترسییەوە كە بە هەموو پێوەرێك دەچێتە خانەی جینۆسایدەوە”.

هەر لەبارەی رەوشی ناوچە جێناکۆکەکانەوە، نوێنەری کاکەییەکانی هەڵەبجە رایگەیاند: “بەهۆی هێرشەکانی داعشەوە چەندین هاوڵاتی كاكەیی شەهید بوون و ماڵ و موڵكیان سوتێندراوە و مەزارگە و شوێنە پیرۆزەكانمان لەناوبراون، لاوازی و نەبوونی هێزی پاراستنی حكومی لەناوچەكەدا ئێمەی كاكەییەكانی خستوەتە ڕوبەِڕوبونەوەی ڕاستەوخۆ لەگەڵ تیرۆریستاندا ئەمەش هێندەی دیكە دۆخی ژیان و مانەوەمان لەو ناوچانە دژواركردووە و بۆنی پلانی ڕاگواستن و جینۆسایدێکی دیكەی لێدەكەین”.

ناوبراو داوای لە هەردوو حكومەتی هەرێم و عێراق كرد: “سروشتی ناوچە جێناکۆکەکان لەبەرچاوبگرن و هێزی سەربازی ڕەوانە بكەن تا بۆشایی ئەمنی لە ناوچەکەدا پڕبکرێتەوە و كاكەییەكان بپارێزرێن، هاوكات لیژنەی باڵای هاوبەشی وەزارەتی پێشمەرگە و وەزارەتی بەرگری عێراق لەن اوچە كاكەیی نشینەكان كارا بكرێتەوە، بۆئەوەی چیدیكە كاكەییەكان نەبنە قوربانی دەستی تیرۆریستانی داعش”.

گردبوونەوەی كاكەییەكانی پارێزگای هەڵەبجە لە كاتێكدایە لە چەند هەفتەی رابردوودا هێرشی چەکدارانی داعش بۆ سەر کاکەییەکانی سنووری ناوچە جێناکۆکەکان زیادیکردووە و بەوهۆیەوە ژمارەیەک هاووڵاتی شەهید و برینداربوون.