پەرلەمانتارێکی عێراق: دەبێت زۆر بەتوندی وەڵامی هێرشەکانی تورکیا بدرێتەوە

SNN-

ئەندامێکی پەرلەمانی عێراق ئەمڕۆ پێنجشەممە 18ی حوزەیران رایگەیاند “دەبێت وەڵامێکی وای تورکیا بدرێتەوە زۆر لەو هێرشانە توندتر بێت کەکردوێتییە سەر خاکی عێراق”.

عەلی بەعیجی دەشڵێت: “دووبارەبوونەوەی هێرشەکانی تورک بۆ سەر خاکی عێراق هۆکارەکەی لاوازیی وەڵام و هەڵوێستەکانی بەغدایە بۆ تورکیا”.

داواش لەحکومەتی عێراق دەکات هەڵوێستی خۆی لەم رووداوانەدا دیاریی بکات کە رۆژانە سەروەریی وڵات پێشێلدەکرێت.

وتیشی: “دەبێت کابینەی نوێ پێشێلی ئەو سوێندە یاساییە نەکات کە بەڵێنی پاراستنی خاک و ئاو و زەویی پێداوە”.

بەوتەی عەلی بەعیجی، دەبێت حکومەت واز لەبەیاننامەی شەرمنانە و بانگهێشتی باڵیۆزی تورکیا بێنێت و وەڵامێکی وای تورکەکان بداتەوە کە لەهێرشەکەی ئەوان بەهێزتر بێت.

بۆردومانەکانی تورکیا لە هەرێم لە چوارچێوەی دوایین ئۆپراسیۆنیدایە دژ بە گەریلاکانی پەکەکە، کە لە دووشەممەی رابردووەوە دەستیپێکردووە، جگە لە زیانی گیانی زیان بەر ژینگەی ناوچەکانیش کەوتوە.

بەگوێرەی زانیارییەکانی SNN کە لە سەرچاوەیەک لە زاخۆ وەریگرتووە: دوو شەو لەمەوبەر هێزێکی کۆماندۆی تورکی بە چەک و تەقەمەنییەوە هاتوونەتە ناو خاکی هەرێمی کوردستان و لە نزیک حەفتەنین جێگیرکراون.