ئێران بە رۆژ ئاوی زێی بچوک دەگرێتەوە و بە شەویش بەری دەداتەوە

SNN- محەمەد مستەفا

بەهۆی نزمبوونەوە و بەرزبوونەوەی لەناکاوی ئاستی ئاوی زێی بچوک لە سنووری قەزای پشدەر، داوا دەکرێت گەشتیاران و هاووڵاتیان لە قەراغ ئاوی زێیەکە نزیک نەبنەوە .

بڕوا محەمەد دانیشتووی گوندی گەرمکان لە سەر زێیی بچوک بە SNN ی راگەیاند: ماوەی چەند رۆژێکە ئێران دەستی کردووە بە گرتنەوە و بەردانەوەی ئاوی زێی بچوک لە بەنداوی کۆڵەسەی شاری سەردەشتی رۆژهەڵات بەشێوەیەکی لەناکاو، بە جۆرێک لە رۆژدا ئاوەکە دەگرێتەوە و لە ئێوارە و شەوانیشدا ئاوەکە بەر دەداتەوە .

وتیشی: “ئەوان وەک دانیشتوانی ناوچەکە بە روونی رۆژانە هەست بە جیاوازی ئاستی ئاوەکە دەکەن، بۆیە وەک دانیشتوانی گوندەکانی سنوورەکە داوا لە گەشتیاران و هاوڵاتیان دەکەن زۆر نزیکی قەراغی ئاوی زێی بچوک نەکەون، چونکە بەرزبوونەوەی ئاوەکەی لەناکاوە .”

باسی لەوەشکرد: لە چەند رۆژی رابردوو بەهۆی بەرزبوونەوەی ئاستی ئاوەکە ئۆتۆمبێلی خێزانێک کە بۆ گەشت و سەیران سەردانی سەر زێیی بچوکیان کردبوو لەناو ئاوی زێیەکە ئۆتۆمبێلەکەیان گیری خوارد .

هاوکات سەلام عومەر بەڕێوبەری ئاوی راپەڕین بە SNN ی راگەیاند: لەکاتی گرتنەوە یاخود کردنەوەی ئاوی زێی بچوک هیچ هەماهەنگییەک لەنێوان بەرپرسانی شاری سەردەشت و ئیدارەی راپەڕین نییە، چونکە ئێران ئاوی زێی بچوک بە موڵکی خۆی دەزانێت چۆنی بوێت ئاوا مامەڵەی لەگەڵدا دەکات.