هێرشەکانی تورکیا ئاڵۆزی گەورە دەخاتە نێوان بەغداو ئەنقەرە

SNN

لەژێر ناوی چنگی هەڵۆ، ئۆپەراسیۆنەکانی تورکیا بەردەوامی هەیەو، لە چەندین لاوە پێشێلی سنوورو خاکی عێراقی کردووە بەتایبەتی لە رووی زەمینییەوە کە چەندین کیلۆمەتر سوپای تورکیا هاتۆتە نێو خاکی عێراق، بەمەبەستی کۆتایی هێنان بە دەسەڵاتی پارتی کرێکارانی کوردستان لە ناوچەکەدا.

سەرەرای ئاگادارکردنەوە بەردەوامەکانی بەغدا بۆ دەسەڵاتدارانی ئەنقەرە بەڵام، هێرشەکانی ئەو وڵاتە بەردەوامە بۆسەر ناوچەکانی باکووری عێراق بەتایبەت گوندەکانی قەزای زاخۆ بە بیانووی هەبوونی بنکەو بارەگاکانی پەکەکە لە ناوچەکەدا، بەو هۆیەشەوە چەندین گوند و شوێن و هاووڵاتی سڤیل بوونەتە ئامانجی فرۆکەکانی تورکیا کە بە شێوەیەکی هەرەمەکی بۆردوومان دەکات.

ماوەی دوو رۆژە هێزەکانی سوپای تورکیا بە چڕی کەوتوونەتە بۆردومانی ئەو گوندانەی دەکەونە سنووری نێوان تورکیاو عێراقەوەو لە چەندین ناوچە شەرو رووبەڕووبوونەوە لەنیوان سوپای تورکیاو هێزەکانی پەکەکە روویداوە، بەوهۆیەوە زۆرترین زیان بەر گوندە سنوورییەکانی کوردستان و کێڵگەو سروشتی ناوچەکە کەوتووە، مستەفا کازمیش بەردەوامە لە ئاگادارکردنەوەی دەسەڵاتدارانی تورکیا لە پێشێلکردنی خاکی عێراق، بەڵام تورکیا بەبێ گوێدانە هیچ کەسێک بەردەوامە لەسەر پێشێلکارییەکانی خۆی لە خاکی عێراقدا.

نزیکەی مانگێکە سوپای تورکیا ئۆپەراسیۆنێکی فراوانی بۆسەر باکووری عێراق و ناوچەکانی کوردستان دەستپێکردووە، لەژێر ناوی (چنگی هەڵۆ) کە رۆژانە لە رێگەی بۆردوومانی ئاسمانی و زەمینییەوە بۆردوومانی گوندەکان و ناوچە سنوورییەکانی هەرێمی کوردستان دەکات و لە چەندین شوێنەوە سوپای تورکیا بە نزیکەی 20 بۆ 40 کیلۆمەتر هاتۆتە نێو خاکی کوردستان و عێراقەوە.