کەشوهەوای جیهان تا ئاستێکی “مەترسیدار” گەرم دەبێت
AFP
SNN
ماڵپەڕی بی بی سی بەریتانی لە زاری چەند پسپۆڕێکی بواری کەشوهەواوە بڵاویکردووەتەوە، کەشوهەوای جیهان بەتایبەت لەو وڵاتانەی کە گەشەسەندوو نین، بەشێوەیەکی بەرچاو بەرزدەبێتەوە و مەترسی بۆ تەندروستی ملیۆنان کەس دروستدەکات.
بی بی سی نوسیویەتی، ملیۆنان کەسی جیهان لە کەشوهەوایەکی هێندە گەرمدا دەژین کە ژیانیان دەکەوێتە مەترسییەوە و پێدەچێت بەشێک لە ئەندامانی جەستەیان پەکبخات.
ئەو کەسانەی کە گەرمای هاوین زۆرترین کاریگەری لەسەریان دروستدەکات، لەو وڵاتانەدا دەژین کە گەشەسەندوو نین و کارەکانیشیان زەحمەتە، وەک کرێکاران و جوتیاران.
ماڵپەڕە بەریتانیەکە ئەوەشی نوسیوە، گەرمبوونی زەوی کەشوهەوا بەجۆرێک گەرم دەکات کە بەشێک لە دانیشتوانی زەوی چیتر توانای بەرگەگرتنیان نامێنێت.
لەوبارەیەوە د.رێبێکا لوکاس توێژەر لە زانکۆی بیرمینگهام وتوویەتی: “بەرکەوتن بە گەرمای زۆر دەبێتەهۆی بورانەوە و رەقبوونی ماسولکە و دواتر پەککەوتنی گورچیلە و ریخۆڵەکان. نابێت هەرگیز مەترسییەکانی گەرمابوونی زۆر بە کەم بزانرێت”.
شارەزایان گازە ژەهرینەکان لە بەرگەهەوادا بە هۆکاری گەرمبوونی زەوی دەزانن، رێکخراوەکانی ژینگە و بەشێک لە وڵاتانیش هەوڵەکانیان بۆ خاوکردنەوەی دیاردەی گەرمبوونی زەوی چڕکردووەتەوە.
