لاهور شێخ جەنگی: یەكێتی شێوازی سیاسەتكردنی دەگۆڕێت
SNN-مەودا مستەفا
لاهور شێخ جەنگی هاوسەرۆكی یەكێتی لە هەولێرەوە رایگەیاند: بەڵێنمانداوە بەئێوە و خوێنی شەهیدەكانتان، یەكێتی شێوازی سیاسەتكردنی دەگۆڕێت، چەقی ململانێی سیاسیمان دەهێنینە هەولێر.
ئەمڕۆ لەكاتی دانانی بەردی بناغەی خوێندنگایەكی بنەڕەتی لە گەڕەكی شەهیدانی شاری هەولێر، لاهور شێخ جەنگی وتارێكی پێشكەشكرد و رایگەیاند: “من لێرەوە بەڵێندەدەم كە یەكێتی نوێ بڕیاریداوە، شێوازی سیاسەتكردنی لە هەرێمی كوردستان بگۆڕێت، بەو شێوازە تەقلیدیە نەبێت كە لە چەند ساڵی رابردوو كردومانە، چەقی ململانێی سیاسیمان دەهێنینە شاری هەولێر، لەكاتێكدا حكومەت و پەرلەمان لێرەن، لەكاتێكدا نوێنەرانی هەموو وڵاتەكان لێرەن”.
هەر لەوبارەیەوە وتی: “جگە لە هەولێر، لە دهۆك و زاخۆ، یەکێتی ململانێی سیاسی دەبێت، ناكرێت چیتر ئێمە لە سلێمانی دابنیشین چاوەڕێی ئەوە بكەین، كادیرەكانمان شەڕە سیاسییەكانمان بۆ بكەن”.
سەبارەت بە کردنەوەی ئەو خوێندنگایەشەوە وتی: “پڕۆژەكە لە ئەستۆی مەكتەبی دارایی یەكێتیی نیشتمانیی كوردستان دەبێت و جگە لەم پڕۆژەیە ژمارەیەك پڕۆژەی تریش ئەنجامدەدەین”.
