بافڵ تاڵەبانی: کێشەی لایەنە سیاسییەکان نابێت لە دامودەزگا حکومییەکاندا رەنگبداتەوە

SNN

ئەمڕۆ دووشەممە بافڵ تاڵەبانی هاوسەرۆکی یەکێتیی نیشتمانی کوردستان لەگەڵ مەسرور بارزانی سەرۆکی حکومەتی هەرێم کۆبووەوە.

لە دیدارەکەدا گفتوگۆ دەربارەی بارودۆخی هەرێمی کوردستان کرا، بافڵ تاڵەبانی رایگەیاند: “کێشەی لایەنە سیاسییەکان نابێت لە دامودەزگا حکومییەکاندا ڕەنگ بداتەوە و پێویستە ھەموو لایەک بە پشووفراوانییەوە ھاوکار بین بۆ ئەوەی بە دانوستان ھەموو کێشەکان چارەسەر بکەین”.

جەختیشی لەوەکردەوە: “ھەموو دەسکەوتەکانمان ئەنجامی یەکڕیزی و تەباییمان بووە. بۆیە ھەموو ھەوڵێک دەدەین ھاوکار بین بۆ ئەوەی ئەو دۆخە سەختە و قەیرانەکان تێپەرێنین”.

هاوکات مەسرور بارزانی رایگەیاند: حکومەتی ھەرێم ھەموو تواناکانی خستووەتە گەڕ ، بۆ ئەوەی ئەو رەوشە ئابووری و تەندروستییە نەخواراوە تێپەڕێنێت و دۆخی ژیان و گوزەرانی ھاووڵاتییان باشتر بێت، بۆ ئەم مەبەستەش چاوەڕوانی پاڵپشتیی ھەموو لایەنەکانە.