بافڵ تاڵەبانی لەگەڵ فەرماندەی لیواکانی ھێزی حەفتا کۆبووەوە

SNN

ئه‌مڕۆ سێشه‌ممه‌ بافڵ تاڵەبانی، ھاوسەرۆکی یەکێتیی نیشتمانیی کوردستان لە مەکتەبی سیاسی لە سلێمانی لەگەڵ فەرماندەی لیواکانی ھێزی حەفتا کۆبووەوە.

لەکۆبوونەوەکەدا، شاڵاو کۆسرەت رەسوڵ، ئەندامی سەرکردایەتی و جەلال شێخ ناجی، لێپرسراوی دەزگای ھەواڵگری پێشمەرگە و عەبدوڵا کانی بەردی، لێپرسراوی مەڵبەندی رێکخستنی پێشمەرگە ئامادەیبوون.

مستەفا چاوڕەش فەرماندەی ھێزەکانی حەفتا، روونکردنەوەیدا لەسەر پەیکەری ھێزەکانی حەفتا و جه‌ختیكرده‌وه‌  لە ئەرک و بەرپرسیارێتییان بۆ پاراستنی ھەرێمی کوردستان.

لەبەرامبەردا بافڵ تاڵەبانی ، باسی لەھەنگاوەکانی رێکخستنەوە و مەشقپێکردن و گەشەپێدانی یەکە سەربازییەکان کرد و بەرچاوڕوونیدا، لەبارەی یەکخستنەوەی ھێزەکان و ھێڵە گشتییەکانی پێشخستنی توانا سەربازی و مرۆییەکانی روونکردەوە و رایگەیاند ھێزی پێشمەرگە ئەبێت لەڕووی زانستی سەربازییەوە رابھێنرێنەوە و پەیکەری سەربازیش لەئاست پێشکەوتن و توانا سەربازییەکانی ئەمڕۆدا بێت بۆ ئەوەش بنەماکانی دیاریکرد.

لە بەرامبەر رۆڵی ھێزی پێشمەرگەی کوردستان لە رووبەڕووبوونەوەی تیرۆریستان و قوربانیدان و خۆین بەخشینیان بۆ ئارامی کوردستان، بافڵ تاڵەبانی ستایشی رۆڵ و ئەرک و بەرپرسیارێتیانی کرد و وتی: رۆڵی جوامێرانەتان لە سەقامگیریی ئاسایش و ئارامی وایکردووە شانازی بە پێشمەرگەی کوردستانەوە بکەین و سەرباری ھەموو ھەوڵەکانمان بۆ رێکخستنەوەتان ، لەخەمی باشترکردنی ژیانی پێشمەرگەداین و ئەم ھەنگاوەش یەکێک دەبێت لەئەولەویەتی کارەکانمان ئەمەش منەت نییە بەڵکو ئەرکمانە خزمەتتان بکەین.

ھاوسەرۆکی یەکێتی، ھێزی پێشمەرگەشی راسپارد وەک ھەمیشە لەخزمەتی ئارامی کوردستانەکەیاندا بن و ھەرئەرکێکیان پێبسپێردرێت کە لەبەرژەوەندی گشتی بێت جێبەجێیبکەن.

سەبارەت بەدۆخی سیاسی و ئەمنی و سەربازی ناوچەکە و پێشھات و گۆڕانکارییە سیاسییەکان بافڵ تاڵه‌بانى ھەڵوەستەی کرد و بەگرنگییەوە خوێندنەوەی بۆ ھاوکێشەکان کردو بڕیار و سیاسەتی یەکێتی لەو رووەوە خستەڕوو.