رێژەی مردن و تووشبوون بە کۆرۆنا لە ڕاپەڕین رووی لە بەرزبوونەوە کردووە

SNN- محەمەد مستەفا

لە سنووری ئیدارەی ڕاپەڕین ئامارەکانی تووشبوون و مردن بە ڤایرۆسی کۆرۆنا بە رێژەیەکی بەرچاو بەرزبوونەتەوە و بەڕێوبەری راگەیاندنی تەندروستیی ڕاپەڕینیش دەڵێت ” رێژەی خۆپارێزی لە ناو هاووڵاتییانی سنووری ئیدارەی ڕاپەڕین لە ئاستێکی زۆر خراپدایە”.

تەها محەمەد بەرپرسی راگەیاندنی تەندروستیی ڕاپەڕین بە SNN ی راگەیاند: بەهۆی گوێنەدانی هاووڵاتییان بە رێکارەکانی خۆپارێزی بەڕێوەچوونی پرسە و بۆنە کۆمەڵایەتییەکان لە سنوورەکە رێژەی تووشبوون و مردن بە ڤایرۆسی کۆرۆنا لە ڕاپەڕین رۆژ له دوای رۆژ بەرزتر دەبێتەوە و تا ئەمڕۆ 87 کەس لە ڕاپەڕین بە ڤایرۆسەکە گیانیان لە دەستداوه.

وتیشی “لە سەنتەرەکانی کۆرۆنا لە ڕانیە و پشدەر پێداویستی پشکنین زۆر کەمە هەر لەبەر ئەوەیە هەفتانە تەنیا دووجار پشکنینی کۆرۆنا بۆ هاووڵاتییان ئەنجامدەدرێت، وە بەهۆی کەمی کیتی پشکنینەوە تەنیا پشکنین بۆ ئەو هاووڵاتییانە دەکرێت کە باری تەندروستیان زۆر خراپە “.

تەها محەمەد باسی لەوەشکرد: تا ئێستا لە دەڤەری ڕاپەڕین 1429 کەس تووشی ڤایرۆسەکە بوون و 387 کەسیش چاک بوونەتەوە، وە زۆرترین رێژەی گیان لە دەستدان بە ڤایرۆسەکە لە ناو پیاواندایە.

بەرپرسی راگەیاندنی تەندروستی راپەڕین رونیشکردەوە : گەر هاوڵاتیان پابەندی رێنماییە تەندروستیەکان نەبن و خۆیان نەپارێزن دۆخەکە زۆر خراپتر دەبێت و سەنتەرەکانی کۆرۆنا لە بیتوێن و پشدەر توانای وەرگرتنی نەخۆشانی کۆرۆنایان نامێنێت .