مامۆستایانى هەڵەبجە: تا دڵنیاییمان پێنەدرێت بە پێدانی 30 رۆژ جارێك مووچە ناچینەوە هۆڵەكانی خوێندن
كۆمهڵێك قوتابى له یهكێك له قوتابخانهكانى پارێزگاى ههڵهبجه | فۆتۆ: SNN
SNN – عەلی حەمە سەعید
ئهمڕۆ هاوشێوەی مامۆستایانی سنووری پارێزگای سلێمانی، مامۆستایان و سەرپەرشتیارانی پەروەردەیی لە سنووری پارێزگای هەڵەبجەش بایكۆتی دەوامییان راگەیاند و نوێنهرى مامۆستا و سهرپهرشتیارانى ئهو پارێزگایهش دهڵێت: “تا دڵنیاییمان پێنەدرێت بە پێدانی 30 رۆژ جارێك مووچە ناچینەوە هۆڵەكانی خوێندن”.
كاروان هەورامی، نوێنهرى مامۆستایان و بەڕێوەبەر و سەرپەرشتیارانی پەروەردەیی لە سنووری پارێزگای هەڵەبجە بە SNNی راگەیاند: “لەگەڵ ئەوەی ئەمڕۆ شەممە، هاوكات بوو لەگەڵ ئەو وادەیەی كە وەزارەتی پەروەردەی حكومەتی هەرێم دیاریكردبوو بۆ دەستپێكردنەوەی دەوامی خوێندن بۆ قۆناغی یەك و دووی بنەڕەتی، بەڵام بەهۆی ئەو ستەمەی لە مامۆستایان دەكرێت ئامادەنەبووین بچینەوە هۆڵەكانی خوێندن و جارێكی دیكە بایكۆتی دەواممان دووپاتكردەوە، ئەوەش بەهۆی لێبڕینی مووچە و خراپی دۆخی مامۆستایان و بێباكی حكومەت لە بەرامبەر مافەكانمان”.
وتیشى: “ئێمە وەك زۆرینەی مامۆستایان و بەڕێوبەرانی سنووری پارێزگای هەڵەبجە پێمان شەرمە لەكاتێكدا مامۆستا بەدەل بەرواری، بڕیاری ئازادكردنی بۆ دەرچووە و هێشتاش لە زینداندایە، ئێمەش بچینەوە هۆڵەكانی خوێندن، لەگەڵ ئەوەشدا بایكۆتی خوێندنی ئەمساڵ رادەگەیەنین، تا ئەوكاتەی سەرۆكی حكومەت و وەزیری پەروەردە دڵنیایی دەدەنه مامۆستایان كە 30 رۆژ جارێك مووچە بەبێ هیچ لێبڕینێك دابەشبكرێت”.
ئەو نوێنەرەی بەڕێوەبەر و مامۆستایانی سنووری پارێزگای هەڵەبجە ئەوەشی خستەڕوو: “لە ساڵی رابردوودا سەرباری دۆخی ناهەموواری مووچە، بەڵام مامۆستایان و بەڕێوبەرانی خوێندنگاكان بڕیارماندا چارەنووسی خوێندنی خوێندكاران بگەیەنینە ئەنجام، ئەگەرچی مافی ئێمە پێشێل دەكرا، بەڵام ئەمساڵ سەرباری بوونی داهاتی نەوت و ناوخۆ و هاوكاری هاوپەیمانان، بەڵام بڕیاری ستەمی لێبڕینی مووچە بەردەوامە ئەمەش لای ئێمە قبوڵكراو نییە”.
