لێبوردنی نێودەوڵەتی داوایەک لە حکومەتی نوێی عێراق دەکات
رێکخراوی لێبوردنی نێودەوڵەتی داوا لە حکومەتی نوێی عێراق دەکات، مافەکانی مرۆڤ بکاتە کاری لەپێشینەی کارنامەکەی و رێگربێت لە توندوتیژی دژی هاووڵاتیان.
لە راگەیەندراوێکیدا کە لە ماڵپەڕی فەرمی رێکخراوەکەوە بڵاوکراوەتەوە، ئاماژە بەوەکراوە، “لەدوای چەندین ساڵ لە توندوتیژی دژ بە هاووڵاتیانی عێراقی، لە ئێستادا حکومەتی نوێی وڵاتەکە دەرفەتێکی هەیە بۆ پاراستنی گەلی عێراق”.
لێبوردنی نێودەوڵەتی ئەوەی خستووەتەڕوو: “گەلی عێراق چەندین ساڵە لەلایەن بەرپرسانی وڵاتەکەیانەوە بەڵێنی بەتاڵیان پێدەدرێت، ئێستا کاتی ئەوە هاتووە ئەو بەڵێنانە بکرێن بە کردار و کار بۆ باشکردنی بژێوی ژیانی هاووڵاتیان بکرێت”.
رێکخراوەکە داوای لە حکومەتەکەی کابینی کردووە، لێکۆڵینەوەیەکی بێلایەن سەبارەت بەو هێز و چەکدارانە دەستپێبکات کە دەستیان بە خوێنی خۆپیشاندەران سوورە.
رێکخراوی لێبوردنی نێودەوڵەتی لە سەردەمی حکومەتە یەکلەدوای یەکەکانی عێراقدا چەندین راپۆرتی سەبارەت بە پێشێلکاری مافەکانی مرۆڤ لە وڵاتەکە خستووەتەڕوو.
