هەڤاڵ ئەبوبەکر: بەتەواوی پابەندی بڕیارەکانی وەزارەتی ناوخۆ دەبین
هەڤاڵ ئەبوبەکر پارێزگاری سلێمانی
SNN-هەڵکەوت سەروەت
پارێزگاری سلێمانی رایگەیاند، لە پارێزگای سلێمانی بەتەواوی پابەندی بڕیارەکانی دوێنێی وەزارەتی ناوخۆ دەبن.
د.هەڤاڵ ئەبوبەکر سەبارەت بە بڕیاری غەرامەکردنی ئەو کەسانەی لە شوێنە گشتییەکاندا دەمامک نابەستن یاخود ئاهەنگ دەگێڕن و پرسە دادەنێن و دەچن بۆ سەرقەبران، بە SNNی راگەیاند، کە ئەو بڕیارانە وەکو خۆیان جێبەجێ دەکرێن.
لە ئەگەری هاتنی شەپۆلێکی دیکەی کۆرۆنا و بەرزبوونەوەی حاڵەتەکانی تووشبوون، د.هەڤاڵ رایگەیاند: “تەنیا چارەسەری کۆنتڕۆڵکردنی بارودۆخەکە جێبەجێکردنی رێکارەکانی خۆپارێزییە”.
ئەمە لەکاتێکدایە، دوێنێ د.خاڵس قادر بەڕێوەبەری گشتیی دیوان لە وەزارەتی تەندروستیی حكوومەتی هەرێمی كوردستان بە SNNی راگەیاندبوو: ئەگەر خۆپارێزی نەکرێت ئەوا پێشبینی دەکرێت لەسەدا 60ی هاووڵاتییان تووشی کۆرۆنابن.
دوێنێ وەزارەتی ناوخۆی هەرێم ژمارەیەک بڕیاری نوێی دەرکرد، لەنێویشیاندا ناچارکردنی سەردانیکەرانی مۆڵ و چێشتخانەکان بە پۆشینی ماسک، سزاشی بۆ ئەو کەسانە دیاریکردووە کە لە شوێنە گشتییەکاندا ماسک نابەستن یاخود ئاهەنگ و پرسە ئەنجامدەدەن و دەبنەهۆی دروستکردنی قەرەباڵغی.
