سیخوڕێک لەناو نووسینگەی تایبەتی راوێژکاری ئەڵمانیا ئاشکرا بوو
ئەنگێلا مێرکڵ و عەبدولفەتاح سیسی
SNN
دادگای ئەڵمانیا رایگەیاند “کەسێکی بە رەگەز میسری کە لە نووسینگەی راگەیاندنی راوێژکاری ئەڵمانیا کار دەکات، سیخوڕیی بۆ بەرژەوەندی قاهیرە کردووە”.
ئەو کارمەندە میسرییە ناوی ئەمین ک-یە و لە ساڵی 1999ەوە زانیاری بەشێوەیەکی نهێنی بۆ میسر گواستووەتەوە و لە مانگی تەمموزی رابردووەوە پۆلیس دۆسیەیەکی بۆ ئەو بابەتە کردووەتەوە.
ئەو کارمەندەی ئەنگێلا مێرکڵ لە ساڵی 2010ەوە بەچڕیی دەستی داوەتە سیخوڕی و هەموو کار و چالاکی و سەردانەکانی مێرکڵ-ی بۆ دەزگای هەواڵگری میسر گواستووەتەوە.
بە پێی راپۆرتێکی دەزگای هەواڵگری ئەڵمانیا، ئەو سیخوڕە کاری بۆ کۆکردنەوەی زانیاریش کردووە لەسەر نەیارانی عەبدولفەتاح سیسی سەرۆکی میسر بەتایبەت ئەندامانی گروپی ئیخوان موسلمین کە لە ئەڵمانیا نیشتەجین و لە ساڵی 2013ەوە رێکخراوەکەیان لە میسر یاساغ کراوە.
