ئەو کچەى سوکایەتى بە کەریم کابان کرد لەلایەن پۆلیسى سلێمانییەوە دەستگیرکرا

SNN

وتەبێژى پۆلیسى سلێمانى رایگەیاند “ئەو کچەى سوکایەتى بە هونەرمەند کەریم کابان کرد لەسەر سکاڵای سەندیکای هونەرمەندان بە فەرمانى دادوەر دەستگیر کرا”.

سەرکەوت ئەحمەد، وتەبێژی پۆلیسی سلێمانی بە SNNى راگەیاند “ئەو کچە لەسەر ئەو قسانەی لە سۆشیال میدیا کردبووی بە هونەرمەندی کۆچکردوو کەریم کابان، لەسەر سکاڵای سەندیکای هونەرمەندان و بەفەرمانى دادوەر دەستگیرکراوە”.

وتیشی: “کچەکە بەپێی ماددەی 2ى خراپ بەکارهێنانی ئامێرەکانی پەیوەندی لەلایەن بنکەی پۆلیسی سەرا دەستگیر کراوە و لە ئێستادا بەندە و لێکۆڵینەوە لەگەڵی دەکرێت”.

دوێنێ شەممە لە پارکی نالی شاری سلێمانی بەشێک لە هونەرمەندان وەک ناڕەزایەتییەک بەرامبەر بە “سوکایەتیکردن” بە هونەرمەندی کۆچکردوو کەریم کابان، گردبوونەوەیەکیان سازکرد و هاوکات سەندیکاى هونەرمەندانیش سکاڵاى یاساییان لەسەر تۆمار کرد.

کەریم کابان، هونەرمەندی گۆرانیبێژی هەڵکەوتووی کورد، رۆژی 14ی کانونی دووەمی ساڵی 2016 کۆچی دوایی کرد، که‌ریم کابان ناوی ته‌واوی (عه‌بدولکه‌ریم جه‌لال مه‌حمود)ە، زیاتر له‌ 70 ساڵ‌ له‌ بواری هونه‌ریدا کاری کردووه‌.

له‌ساڵی 1927 له‌ گه‌ڕه‌کی شێخانی نزیک سه‌رای سلێمانی له دایکبووه‌ له‌ ساڵی 1941 یه‌که‌م گۆرانی وتووه‌.