بافڵ تاڵەبانی: کاری لەپێشینەی یەکێتی دابینکردنی بودجە و قوتی خەڵکی ھەرێمی کوردستانە

SNN

هاوسەرۆکی یەکێتیی نیشتمانیی کوردستان دەڵێت: “کاری لەپێشینەی یەکێتی دابینکردنی بودجە و قوتی ھەرێمی کوردستانە، “چەند دەرچەیەکی سیاسی و نیشتمانی بۆ رزگاربوون لەم قەیرانانە خراوەتەڕوو”.

ئەمڕۆ چوارشەممە لە شاری ھەولێر بافڵ تاڵەبانی، ھاوسەرۆکی یەکێتیی نیشتمانیی کوردستان چاویکەوت بە ستیڤن هیکی، باڵیۆزی بەریتانیا لە عێراق و جەیمس سۆرنتۆن، كونسوڵی گشتی بەریتانیا لە هەرێمی كوردستان.

لە دیدارێکدا جەخت لە ھەماھەنگی و ھاریکاری زیاتری نێوان ھەردوولا کرایەوە و پەرەپێدانی پەیوەندییەکانیش دووپاتکرایەوە بەشێوەیەک کە خزمەت بە بەرژەوەندییە باڵاکانی ھەرێم و جێگیریی سیاسی، ئابووری و ئارامی زیاتر لە ناوچەکە بکات.

ھاوسەرۆکی یەکێتیی نیشتمانیی کوردستان رۆشنایی خستەسەر دوایین گۆڕانکارییە سیاسیی، ئابووری و ئەمنییەکان و ھەڵوەستەی لەسەر کێشەکانی نێوان ھەولێر و بەغدا کرد و باسی لە ھەوڵەکانی یەکێتی کرد بۆ تێپەڕاندنی دۆخەکە و گەیشتن بە رێککەوتن لەسەر بنەمای دەستوور و بەرژەوەندی ھاوبەش.

بۆ ئەوەش بافڵ تاڵەبانی رایگەیاند “کاری لەپێشینەی یەکێتی دابینکردنی بودجە و قوتی ھەرێمی کوردستانە، بۆ ئەوەش چەند دەرچەیەکی سیاسی و نیشتمانی بۆ رزگاربوون لەم قەیرانانە خستەڕوو.

ھەر لە دیدارەکەدا بە وردی باس لە مەترسی پاشماوەکانی تیرۆریستانی داعش لە چەند ناوچەیەکی عێراق کرا و جەخت لە ھەماھەنگی و ھاوکاری زیاتر کرایەوە بۆ پاراستنی ئاسایش و ئارامی زیاتر لە ناوچەکە.