ئەمریکا: لە کاتێکی گونجاودا وەڵامی هێرشە مووشەکیەکان لە عێراق دەدەینەوە

SNN

وەزارەتی دەرەوەی ئەمریکا جارێکی دیکە نیگەرانی دەربڕی لەو هێرشە مووشەکیانەی کە لە عێراق دەکرێنەسەر هێزەکانی هاوپەیمانان و رایگەیاند: “لەکاتی گونجاودا وەڵامیان دەدەینەوە”.

نێد پرایس وتەبێژی وەزارەتی دەرەوەی ئەمریکا لە کۆنفرانسێکی رۆژنامەوانیدا رایگەیاند: “هێرشە مووشەکیەکانی عێراق لەکات و شوێنی خۆیاندا وەڵام دەدرێنەوە و وەڵامەکەش توند دەبێت”.

پرایس وتی: هەروەک چۆن لەدوای هێرشە مووشەکیەکەی سەر هەولێر وتوومانە، ئێستاش لەدوای هێرشە مووشەکیەکەی شەوی رابردووی ناوچەی سەوزی بەغدا دووپاتیدەکەینەوە کە زۆر توڕە و نیگەرانین.

 ئاماژەی بەوەشکردووە، “ئێران بە بەرپرس دەزانین لە بەرامبەر کارەکانی گروپە بەکرێگیراوەکان بۆ هێرشکردنە سەر ئەمریکییەکان.”

شەوی رابردوو سوپای عێراق لە بەیاننامەیەکدا رایگەیاند لانی کەم دوو موشەک لە ناوچەی سەوزی بەغدا کەوتوونەتە خوارەوە، بەڵام هیچ زیانێکی گیانیان لێنەکەوتۆتەوە.

مووشەکەکان بەر دەزگای ئاسایشی نیشتمانی عێراق کەوتبوون کە نزیکە لە باڵیۆزخانەی ئەمریکاوە، کە ئەمە سێیەم هێرشە لە ماوەی چەند رۆژێکی کەمدا بەر ئەو ناوچانە بکەوێت کە سەرباز یان دیپلۆماتکاری ئەمریکی لێیە.