شارەوانی سلێمانی: پارەی کۆمپانياکانی پاککەرەوە ئامادەيە

SNN

سەرۆکی شارەوانی سلێمانی رايگەياند: “پارەی کۆمپانياکانی پاککەرەوە ئامادەيە بەڵام گرفت لە گرێبەستەکانيان هەيە و ئەو کۆمپانيايانە خيتاب زەمان(دەستەبەری بانکی)يان ئامادە نەکردووە”.

توانا کەمال سەرۆکی شارەوانی سلێمانی لە کۆنفرانسێکی رۆژنامەنوسيدا رايگەياند: “هەر رۆژێک ئەو کۆمپانيايانە لە کارەکانيان دوابکەون غەرامەی خۆيان هەيە و دەبێت بە سزا بەسەريانەوە”.

وتيشی “ئامادەکردنی خيتاب زەمان(دەستەبەری بانکی) لە مەرجەکانی تەندەری پڕۆژەکەدا هاتووە و ئەگەر ئەو کۆمپانيايانە ناتوانن پابەندبن بە مەرجەکانەوە نە دەبوو تەندەر پێشکەشبکەن”.

ئاماژەی بەوەشکرد: “ئەو کۆمپانيايانە لەدوای دەرچونی تەندەرەکە دەست بەکاربوون بەڵام ئامادەکردنی گرێبەستەکانيان کە لە وەزارەتی شارەوانی دەکرێت کۆمەڵێک بەدواداچونی ويستووە و چەند مانگێکی خاياندووە، لە ئێستادا ئەو کۆمپانيايانە دەتوانن خيتاب زەمان(دەستەبەری بانکی) ئامادە بکەن و گرێبەستيان بۆ بکرێت”.

ئەمڕۆ نوێنەری کۆمپانيا مانگرتووەکان بە SNNی راگەياند: “ماوەی سێ مانگە سولفەمان پێنەدراوە بەو هۆيەوە لە ئێوارەی دوێنێوە مانمانگرتووە و تا داواکارييەکانمان جێبەجێنەکرێت دەست بەکار نابينەوە”.

باسی لەوەشکرد: “لە وەزارەتی شارەوانی لە هەولێر داوای خيتاب زەمان(دەستەبەری بانکی)مان لێ دەکەن بۆ ئۆتۆمبيلەکانمان بەبڕی دوو مليار ئەوەش قورسە بۆ ئێمە”.