پرۆسەی وەرگرتنی خوێندکارە کوردەکانی کەرکوک لە زانکۆکانی هەرێم دەستپێدەکات

SNN

لە دووشەممەوە پرۆسەی دابەشکردنی فۆرم بەسەر خوێندکارانی خوێندنی کوردی لە کەرکوک دابەشدەکرێت بەمەبەستی وەرگرتنیان لە زانکۆ و پەیمانگاکانی هەرێم.

شێرزاد سەعید، بەڕێوەبەری نووسینگەی كەركوكی وەزارەتی خوێندنی باڵا و توێژینەوەی زانستی حكوومەتی هەرێمی كوردستان لە لێدوانێکیدا راگەیاند: “لە دووشەممەوە 8ی مانگ تاكوو رۆژی پینجشەممەی داهاتوو دەست دەكەین بە دابەشكردنی فۆرم بەسەر خوێندکارانی دەرچووی قۆناغی شەشەمی ئامادەیی خوێندنی كوردی لە كەركووك، بۆ وەرگرتنیان لە زانكۆ و پەیمانگاكانی هەرێمی كوردستان”.

ناوبراو وتی: “هەر خوێندکارێک كە فۆرمەكەی وەرگرت و دوای پڕ كردنەوەی لە ماوەی دیاریكراودا دەیگەڕێنێتەوە بۆ ئێمە و ئێمەش دەینێرین بۆ قبووڵی ناوەندی وەزارەتی خوێندنی باڵاو توێژینەوەی زانستی هەرێمی كوردستان و دواتر بەپێی نمرەكانیان وەردەگیرێن لە زانكۆ و پەیمانگاكان”.

لە ماوەی رابردوو ئەنجامی وەرگرتنی خوێندکارانی هەرێم لە زانکۆ و پەیمانگاکان بڵاوکرایەوە و لەدوای دروستبوونی رەخنەش لە کەمی وەرگرتنی خوێندکاران لە بەشێک لە کۆلێژە حکومییەکان، ژمارەی کورسی خوێندن لەو کۆلێژانە زیادکرا.