سیروان محەمەد: سلێمانی دەكەینە ناوەندێك بۆ بازرگانی لەگەڵ پارێزگاكانی دیكەی عێراق

SNN-عەلی حەمە سەعید

سەرۆكی ژووری بازرگانی و پیشەسازی پارێزگای سلێمانی ئاماژە بەوەدەكات بەهۆی ئەو چالاكییە بەردەوامانەی كە لەبورای پیشەسازی و بازرگانی لە سنوری پارێزگای سلێمانی ئەنجام دەدرێت و هاوكات بەهۆی ئەو پەیوەندییە بازرگانییە پتەوەی لەگەڵ چەند پارێزگایەكی ئێران هەمانە، ئەمە وایكردووە كە سلێمانی بكەینە ناوەند بۆ كاری بازرگانی لەگەڵ پارێزگاكانی دیكەی عێراق لە باشوور و ناوەڕاست.

سیروان محەمەد، سەرۆكی ژووری بازرگانی سلێمانی بە SNNی راگەیاند: بەهۆی هەڵكەوتەی شوێنی جوگرافی سلێمانی و هەروەها بوونی چەندین دەروازی سنوری و بوونی پەیوەندی بەهێزی بازرگانی لەگەل چەند پارێزگایەكی ئێران وایكردووە كە ئەو شمەك و كاڵایانەی كە لە ئێرانەوە هاوردە دەكرێن لەڕێگەی پارێزگای سلێمانییەوە ڕەوانەی پارێزگاكانی دیكەی عێراق و هەرێمی كوردستان بكرێت، هەر ئەمە وایكردووە كە دەمانەوێت سلێمانی بكەین ناوەندێك بۆ كاری بازرگانی لەگەڵ پارێزگاكانی باشوور و ناوەڕاستی عێراق.

ئاماژەی بەوەشكرد، هەموو هەوڵێكمان بۆ ئەوەیە، كە ئەو پەیوەندییە بازرگانییە پتەوەی كە لەنێوان سلێمانی و پارێزگاكانی ئێران هەیە زیاتر پەرەی پێبدەین و زیاتری بكەین بۆ ئەمەبەستەش ئەو كێشەو گرفتانەی كە لە مەرزەكان بۆ بازرگانانی هەردولامان دێتە پێش بتوانین چارەسەریان بكەین، چونكە لەئێستادا كێبڕكێیەك درویتبووە لە نێوان مەرزەكاندا و هەموو لایەك هەوڵدەدەن زۆرترین بازرگان كاڵاو شەمەكەكانیان لەو مەرزانەوە هاوردەو هەناردە بكەن.

سەرۆكی ژوری بازرگانی سلێمانی ئەوەشی خستەڕوو، خۆشبەختانە لەئێستادا كەرتی پیشەسازی و بازرگانی لە سلێمانی بەرەوپێشچوونی باشی بەخۆیەوە بینیوە، بەڵام ئەوە هێشتا لەئاست داخوازی و داواكارییەكانی ئێمەدا نییە و هەوڵدەدەین زیاتر پەرە بەبوارەكانی پیشەسازی و بازرگانی بدەین، بۆئەوەش دەبێت حكومەتی هەرێم و وەزارەتە پەوەندیدارەكان هاوكاربن بۆ ئەوەی تێچووی پرۆژەكان لەسەر خاوەن كارەكان كەمبكەنەوە چ لەڕووی نرخی سوتەمەنی یاخود نرخی كارەبا، بۆ ئەوەی بتوانین كێبڕكێی كاڵا دەرەكییەكان بكەین.