ئامادەکاری بۆ هاتنی گەشتياران دەکرێت بۆ نەورۆز

SNN-عەلی حەمە سەعید

بەرێوبەری گشتی گەشتوگوزاری سلێمانی ئاماژە بەوەدەكات: لەگەڵ نزیكبوونەوە لە وەرزی بەهار و هاتنی گەشتیاران پلانی پێویستمان داناوە بۆ پێشوازی لە گەشتیاران و ئەوەی پێمان بكرێت بۆ ئاسانكاری هاتنی گەشتیاران ئەنجامیدەدەین.

عەلی ڕەئوف، بەڕێوەبەری گشتی گەشتوگوزاری سلێمانی بە SNNی ڕاگەیاند: لەساڵانی رابردوودا پارێزگای سلێمانی لە پێشەنگی پارێزگاكانی دیكەی هەرێمدا بووە بۆ هاتنی گەشتیاران بە تایبەت لەساڵەكانی  2018و  2019و  2021پێشەنگ بووە لە ڕووی هاتنی گەشتیارەوە، ئەمەش دەرفەتێكی باشە بۆ خاوەن ئۆتێل ‌و ریستۆرانت ‌و فرۆشیارانی ناو بازاڕو مۆڵەكان كە بتوانن لەڕووی داراییەوە سوود لەهاتنی ئەو گەشتیارانە ببینن.

ئاماژەی بەوەشكرد: بەگوێرەی یاسا دەتوانین لە %15ی ئەو داهاتەی لە بازرگانان ‌و خاوەنكاران وەردەگیرێت بكەین بەپڕۆژەی بچوكی خزمەتگوزاری بۆ ناوچە گەشتیارییەكان، هەر لەوچوارچێوەیەشدا چەندین پڕۆژەی گرنگ‌ و ستراتیژیمان لەلایەن خاوەنكاران ‌و بازرگانانەوە پێشكەش كراوەو داوای مۆڵەت دەكەن، وەكو پڕۆژەی گەشتیاری دوكان ‌و بوژاندنەوەی چەمی قلیاسان‌ و سەرچنارو شێركوژ، ئێستاش لەقۆناغی دیزاین ‌و مۆڵەتدان.

بەڕێوەبەری گشتی گەشتوگوزاری سلێمانی ئەوەشی خستەڕوو: بەهۆی بوونی سەدان ناوچەی گەشتیاری و هەروەها ئەنجامدانی ئاسانكاری بۆ هاتنی گەشتیاران، لە ساڵی ڕابردوودا یەك ملیۆن و 500 هەزار گەشتیار ڕوویان لە سنووری پارێزگای سلێمانی كردووە بۆ ئەمساڵیش ئامادەكاری پێوست كراوە بۆ پێشوازی لەهاتنی گەشتیاران.