مەکتەبی سیاسیی یەکێتی: هەوڵی ساڕێژکردنی برینەکانی ئەنفال دەدەین

SNN

مەکتەبی سیاسی یەکێتی لە بەیاننامەیەکدا لە ساڵیادی کارەساتی ئەنفالدا رایدەگەیەنێت، یەکێتی بۆ ڕێگریکردن لە دووبارەبونەوەی تاوانێکی وەها بەرامبەر گەلەکەمان، لە نێوەندە سیاسی و دبلۆماسیەکاندا گشت توانایەکی خستۆتەگەڕ بۆ زامنی زیاتری پارێزگاریکردن لە مافە دەستورییەکانمان  کە جێبەجێکراون وکارو هەوڵی بەردەوام بۆ ئەوانەشی بەدینەهاتوون.

راشیگەیاندوە: ئەمانەش پێویستیان  بە گفتوگۆ و زمانی دیالۆگی بەردەوامە نەک  مزایەدەی بێ هودە کە ببنە هۆى هەڵچون و دروست بونی تەنگژەى وەها کە ئاقارەکەى بەرەو کێشە و ڕودانەوەی کارەساتێکی تر بڕوات و بارگرانی زیاتر لەسەرشانی گەلەکەمان دروست بکات .

دەقی بەیاننامەکە

کەسوکارى قوربانیانی  ئەنفال
کۆمەڵانی خەڵکی کوردستان

ئەمڕۆ کە یادی سی و چوار ساڵەی ترسناکترین تاوانی سەدەى بیست تاوانی ئەنفال دەکەینەوە، وێرای دانەواندنی سەرى رێز بۆ رۆحی پاکی گشت ئەو مرۆڤانەی کە بەدڕندانەترین شێوە لەگۆڕە بە کۆمەڵەکاندا گولەباران کران، یان لەبرس و تینوێتیدا لەسەحرا وزیندانەکاندا ژیانیان لێسەندرایەوە.

لەم یادەدا وەبیر هەموو لایەکی دەهێنینەوە،  بەهۆى زۆر و زەوەندیی ئەو زیانە گیانی وماڵی ومەعنەوییانەی کەبەخەڵک وناوچەکانی کوردستان کەوت لەو تاوانەدا، سەرەڕای هەوڵەکانی سۆراغ و گەڕان بە دواى  بێسەروشوێنکراوان و دۆزینەوەى گۆڕە بە کۆمەڵەکان و ئاشکراکردنی ناسنامەى شەهیدەکان و هێنانەوەی روفاتەکانیان بۆ  کوردستان، بەڵام هێشتا لە ناساندنی تاوانی ئەنفال  وەک جینۆسایدکردنی گەلی کورد لە ئاستی جیهانیدا و قەرەبوکردنەوەی زیاتری ئەوانەى لەو تاوانەدا رزگاریان بووە و هەروەها کەس وکاری قوربانیەکان و ئاوەدانکردنەوەی ئەو گوند وناوچانەى بەهۆى پەلامارەکانی ئەنفالەوە زۆرترین زیانیان بەرکەوتووە نەگەیشتۆتە ئاستی رازیبوونی هەموو لایەکمان .

بۆیە لێرەدا جارێکی تر دووپاتیدەکینەوە کە یەکێتیی نیشتمانیی کوردستان هەمیشە لەو هەوڵانەی بەردەوامە کەلەسەرەوە ئاماژەمانپێدا و هەروەها بۆ ڕێگریکردن لە دووبارەبونەوەی تاوانێکی وەها بەرامبەر گەلەکەمان، لە نێوەندە سیاسی و دبلۆماسیەکاندا گشت  توانایەکی خستۆتەگەڕ بۆ زامنی زیاتری پارێزگاریکردن لەو مافە دەستوریانەمان کە جێبەجێکراون وکارو هەوڵی بەردەوام بۆ ئەوانەشی بەدینەهاتوون، ئەمانەش پێویستیان  بە گفتوگۆ و زمانی دیالۆگی بەردەوامە نەک  مزایەدەی بێ هودە کە ببنە هۆى هەڵچون و دروست بونی تەنگژەى وەها کە ئاقارەکەى بەرەو کێشە و ڕودانەوەی کارەساتێکی تر بڕوات و بارگرانی زیاتر لەسەرشانی گەلەکەمان دروست بکات .

هەر لەم یادە خەمناک و کارەساتبارەدا بەڵێن دووپاتدەکەینەوە هەموو هەوڵەکانمان بۆساڕێژکردنی یەکجارەکی برینەکانی ئەنفال و لێکەوتەکانێتی  .