کەسوکاری ئەنفالکراوان بەشداری يادی ئەنفال ناکەن

SNN

ئەمڕۆ 34 ساڵ تێدەپەڕێت بەسەر يادی ئەنفالی گەلی کورددا، لەم يادەدا کەسوکاری ئەنفال رايانگەياند: بەشداری يادی ئەنفال ناکەين وەک پەيامێک بۆ ئەنجومەنی وەزيران.

بەشێک لە کەسوکاری ئەنفالکراوان لە کۆنفرانسێکی رۆژنامەنوسيدا وەک نارەزاييەک لە دۆخی خۆيان باسيان لەوە کرد: بەشداری يادی ئەنفال ناکەن، ئەوەش وەک پەيامێک بۆ ئەنجومەنی وەزيران و وەزارەتی شەهيدان تاکو بەزووی شارەزايان و ياسا ناسان بێنە سەرخەت و دەرچەيەک بدۆزنەوە بۆ دەربازکردنی کەيسەکانی ئەنفال لەو چەقبەستوويەی تێيدايە.

هاوکات، ئەمڕۆ لە مۆنۆمێنتی ئەنفال لە چەمچەماڵ رێورەسمێک بۆ يادکردنەوەی ئەنفال بەڕێوەدەچێت، بەشێک لە کەسوکارانی ئەنفاليش لە گرتووخانەی نوگرەسەلمان يادی ئەنفال دەکەنەوە.

رۆژی 1988/4/14 رژێمی بەعس شاڵاوی ئەنفالی لە گەرميان دەستپێکرد، لە کۆمەڵکوژییەکەدا زياتر لە 180هەزار کەس کوژران کە بەشێکی زۆريان ژن و منداڵ بوون.

وڵاتانی سويد، نەرویج، و بەریتانیا بەفەرمی کۆمەڵکوژیی ئەنفالیان بە جینۆساید ناساندووە، لە 5ی کانوونی یەکەمی 2012 پەرلەمانی سويد بڕیاری لەسەر ناساندنی ئەم جینۆسایدە دا، لە 28ی شوباتی  2013ئەنجومەنی نوێنەرانی بەڕيتانيا بەشێوەیەکی یاسایی جینۆسایدی ئەنفالی ناساند.