“نرخى عهرزه و خانوو بۆ دوو هێنده بهرزبووهتهوه”
بهغداى پایتهختى عێراق | فۆتۆ: Robert Smith
SNN
شارهزایهكى ئابوورى رایدهگهیهنێت: نرخى خانووبهر و عهرزه له ساڵى 2018هوه تاوهكو ئێستا بۆ دوو هێنده بهرزبووهتهوه، دهشڵێت: “نرخى عهرزه له بهغدا گرانتره له لهندهن”.
ئهمڕۆ ههینى عهبدولڕهحیم مهشههدانى، شارهزاى ئابوورى عێراق رایگهیاند، “له دواى ساڵى 2018هوه تاوهكو ئێستا نرخى زهوى و خانووبهر له عێراق بۆ دوو هێنده بهرزبووهتهوه، چونكه لهو ساڵهوه تاوهكو ئێستا دامهزراوه نێودهوڵهتییهكان سزایان بهسهر كۆمهڵێك كهسایهتى عێراقدا سهپاندووه و جوڵه داراییهكانیان له دهرهوه سنووردار كردوون. ئهو كهسایهتییانه ناچاربوون بگهڕێنهوه عێراق و پارهكانیان لهناو عێراقدا خهرج بكهن”.
وتیشى: “یهكێك لهو كهرتانهى كه زۆرترین كهس و سهرمایهدار روویان تێكردووه لهدواى ئهم گۆڕانكارییهوه بریتیه له كهرتى خانووبهر و بیناسازى، ههربۆیه نرخى زهوى و خانووبهره بهشێوهیهكى چاوهڕواننهكراو بهرزبوونهوهى بهخۆیهوه بینیووه”.
ئهو شارهزا ئابوورییه بهراورد لهنێوان نرخى زهوى له لهندهنى پایتهختى بهریتانیا و بهغداى پايتهختى عێراق دهكات و روونيدهكاتهوه، “نرخى مهترێكى چوارگۆشه زهوى له ههندێك ناوچهى بهغدا دهگاته 4 بۆ 5 ههزار دۆلار، ئهمه ئهگهر بهراورد بكرێت به لهندهن نرخهكه زۆر گرانتره”.
به وتهى ئهو شارهزا ئابوورییه، “بهرزبوونهوهى نرخى زهوى و خانووبهر بهردهوامدهبێت بههۆى ئهوهى ژمارهیهكى زۆر بازرگان و سیاسى و سهرمایهدار به ناچارى روویان لهم كهرته كردووه”.
