شەپۆلێكی بارانبارین عێراق و هەرێم دەگرێتەوە

SNN

بەپێی پێشبینەكانی كەشناسی عێراق، لە رۆژی 21ی مانگەوە شەپۆلێكی بارانبارین عێراق و هەرێمی كوردستان دەگرێتەوە و شارەزایەكی كەشناسی دەڵێت: “شەپۆلەكە تا كۆتایی مانگ و سەرەتای مانگی داهاتووش بەردەوام دەبێت”.

دەستەی كەشناسی عێراق لەڕاگەیەنراوێكدا ئاماژەی بەوەكردووە، لە ڕۆژی 21ی نیسانەوە شەپۆلێكی نوێی بارانبارین عێراق و هەرێمی كوردستان دەگرێتەوە بەشێوەی ناوبەناو، كە سەرچاوەكەی لە دەریای سورەوەیە و كاریگەرییەكەی لەسەر كەشوهەوای تەواوی وڵاتانی ناوچەكە دەردەكەوێت.

ئاراس جەبار، شارەزای كەشناسی لە لێدوانێکی میدیادا رایگەیاند: “بەپێی پێشبینیەكانی GFS ئەمریكی ئەگەر ھەیە كۆتاییەكانی ئەم مانگە لە 24ی مانگ بەدواوە تا 30ی مانگ و سەرەتای مانگی ئایندەش وڵاتانی سعودیە و عێراق و سوریا بكەوێتە ژێر كاریگەری ھاتنی شێیەكی مەداری لەدەریای سوورەوە.

دەشڵێت: “لە ئەگەری جێگیربوونی لەو مەودایەدا كەشی ناوچەكانمان تەڕ و شێدار ئەبێتەوە و بارانێكی باش لەناوچەكەدا دەستپێدەكاتەوە، كە ماوەیەكی زۆرە بێ بارانی و كەشێكی وشك بەسەر تەواوی ناوچەكانی ئەم وڵاتانەدا زاڵبووە”.