به‌هۆى خۆڵبارینه‌وه پشوو راگه‌یه‌ندرا و گه‌شته‌كانى دوو فڕۆكه‌خانه وه‌ستان
خۆڵبارین
SNN
به‌یانى ئه‌مڕۆ دووشه‌ممه به‌هۆى خۆڵبارینه‌وه به‌ڕێوه‌به‌رایه‌تى په‌روه‌رده‌ى كه‌ركوك بڕیاریدا تاقیكردنه‌وه‌كان دوابخات و به‌هه‌مان هۆكاریش گه‌شته‌كانی فڕۆكه‌خانه‌ى نێوده‌وڵه‌تى نه‌جه‌ف و به‌غدا دواخران.
به‌یانى ئه‌مڕۆ شه‌پۆلێكى خۆڵبارین ته‌واوى شاره‌كانى عێراقى گرته‌وه و به‌هۆى چڕى خۆڵبارینه‌كه‌شه‌وه به‌ڕێوه‌به‌رایه‌تى په‌روه‌رده‌ى كه‌ركوك رایگه‌یاند، “بڕیارماندا به دواخستنى تاقیكردنه‌وه‌كان”.
هاوكات هه‌ردوو فڕۆكه‌خانه‌ى نێوده‌وڵه‌تى نه‌جه‌ف و به‌غدا رایانگه‌یاند، “به‌هۆى چڕى خۆڵبارینه‌وه بڕیارماندا به راگرتنى گه‌شته‌كانمان تاوه‌كو كاتێك نادیار”.
دوێنێ یه‌كشه‌ممه به‌ڕێوه‌به‌رایه‌تى گشتى كه‌شناسى عێراق رایگه‌یاند، “ئاستی خۆڵبارین له پێنج پارێزگا كه‌م و له شه‌ش پارێزگا مامناوه‌ند و له حه‌وت پارێزگاكه‌ی دیكه‌ش تووند ده‌بێت. له هه‌ریه‌ك له پارێزگاكانی دهۆك، سلێمانی (و هه‌ڵه‌بجه)، دیالە، واست و میسان ئاستی خۆڵبارین كه‌م ده‌بێت، له پارێزگاكانی هەولێر، كەركوك، بابل، دیوانیە، زەیقار و بەسره ئاستی خۆڵبارین مامناوەند ده‌بێت، به‌ڵام له پارێزگاكانی تر، موسه‌ننا، نه‌جه‌ف، كه‌ربه‌لا، به‌غدا، سه‌ڵاحه‌ددین، ئه‌نبار و موسڵ ئاستی خۆڵبارین توند و چڕ، دەبێت”.
