بۆ پاراستنی سەلامەتی خانەنشینانی سلێمانی بە ڕێگەی نوێ مووچە دابەشدەکرێت

SNN-عەلی حەمە سەعید

بەمەبەستی نەهێشتنی قەرەباڵغی لەبەردەم بانكەکاندا و هاوكات پاراستنی زیاتری سەلامەتی خانەنشینان، لە بانكی مەڵكەنی شاری سلێمانی بە كۆدی تایبەتی خانەنشینانی شارستانی مووچەكانیان وەردەگرن، بەڕێوەبەری بانكەكەش ئاماژە بەوەدەكات كە بەماوەی چەند ڕۆژێك سەرجەم مووچەخۆران مووچەكانیان وەردەگرن و هیچ قەرەباڵغییەك دروستنابێت، بەڕێوەبەری بانكەكەش دەڵێت، “پڕۆسەی دابەشكردنی مووچەكانیان پێنج رۆژ دەخایێنێت”

شۆخان عومەر، بەڕێوەبەری بانكی مەڵكەندی لە سلێمانی بە SNNی ڕاگەیاند: بەمەبەستی كارئاسانی زیاتر بۆ خانەنشینان و نەهێشتنی قەرەباڵغی لەبەردەم بانكەكەماندا و بۆ زیاتر پاراستنی سەلامەتی خانەنشینان لە كاتی دابەشكردنی مووچەی خانەنشینان، لەم مانگەوە لە دابەشكردنی مووچەی خانەنشینان سیستەمی كۆدی تایبەت بە خانەنشینان پەیڕەو دەكەین كە هەر خانەنشینێك لەسەر ناسنامەكەی كۆدێكی تایبەت هەیە.

ئاماژەی بەوەشكرد، لە دابەشكردنی مووچەی خانەنشینان بە جێبەجێكردنی ئەو سیستەمە پێویستیمان بە ماوەی نزیكەی پێنج ڕۆژ دەبێت، هاوكات وەزارەتی دارایش رەزامەندییان دەربڕیوە بۆ ئەوەی بەوشێوازە مووچەی خانەنشینان دابەشبكرێت ئەمەش هۆكار دەبێت بۆ ئەوەی هیچ دۆخێكی نەخوازراو دروست نەبێت.

بەڕێوەبەری بانكی مەڵكەندی ئەوەشی خستەڕوو، نزیكەی هەشت هەزار خانەنشینی شارستانی لە بانكی مەڵكەندی مووچە وەردەگرن، بۆیە بە گوێرەی كۆدی سەر ناسنامەكانیان، رۆژی شەممە 21/5/2022 لە بانكی مەڵكەندی ئەو خانەنیشانەی كە كۆدی 10 هەزار، 11 هەزار، 27 هەزار مووچەكانیان وەردەگرن، رۆژی دواتر 28 هەزار و 29 هەزار، رۆژی دووشەممەش، 30 هەزار و 31 هەزار، رۆژی سێشەممە كۆدی 32 و 33 هەزار، رۆژی چوارشەممە34، 35، 36 هەزار مووچەكانیان وەردەگرن.