راگەيەندراوێک لە وەزارەتی کشتوکاڵەوە لەبارەی بڕيارەکەی بافڵ جەلال تاڵەبانی

SNN

وەزيری کشتوکاڵ و سەرچاوەکانی ئاوی هەرێم رايگەياند: هيدوادارين هەنگاوەکەی بافڵ جەلال تاڵەبانی بۆ ناشتنی يەک مليۆن نەمام ببێتە بنەما و نەریت و مۆدێلی سیاسەتکردنی حزبەکانی کوردستان لە پێناو پێشبرکێی زیادکردنی پانتایی سەوزایی و پاراستنی ژینگە”.

بێگەرد تاڵەبانی وەزيری کشتوکاڵی هەرێم لە راگەيەندراوێکدا بڵاويکردەوە: بەناوی وەزارەتی کشتوکاڵ و سەرچاوەکانی ئاو پێشوازی دەکەین لەو بڕیارەی بافل جەلال تاڵەبانی سەرۆکی یەکێتیی نیشتیمانیی کوردستان بە دەستپێشخەری و لە ئەستۆگرتنی داچاندنی (یەک ملیۆن نەمام) لەناوچە جیاجیاکانی کوردستان، لە پێناو سەوزکردنی ژینگەی کوردستانمان.

دەشڵێت “هیوادارین ئەم هەنگاوە هاوشانی پڕۆژە خزمەتگوزاریەکانی تری حکومەت، ببێتە بنەما و نەریت و مۆدێلی سیاسەتکردنی حزبەکانی کوردستان لە پێناو پێشبرکێی زیادکردنی پانتایی سەوزایی و پاراستنی ژینگە، کە خزمەتێکی راستەوخۆ دەگەیەنێت بە ژینگەی کوردستان و دانیشتوانەکەی.

ئاماژەی بەوەشکرد: لە دۆخی ئێستادا هەرێمی کوردستان و ناوچەکە، رووبەرووی گۆرانکاری خێرای کەش و هەواو دیاردەی ووشکەساڵی و کەمبارانی و کەمئاوی و مەترسی تێکچوونی دۆخی ژینگە و هاتنی شەپۆلێکی خۆڵبارین بۆتەوە لە ناوەراست و خوارووی عێراق بۆ هەرێمی کوردستان.

راشيگەياند: وەک وەزارەت لە چوارچێوەی یاسا و ڕێنماییەکان پاڵپشت و هاوکاری ئەم جۆرە دەستپێشخەریانە دەبین و دەستخۆشی لە بافل جەلال تاڵەبانی دەکەین، وە پشتگیری تەواوی ئەم هەنگاوە ژینگە دۆستانەیەی دەکەین، کەدڵنیاین به جێبەجێکردنی دەبێتە مایەی پارێزگاریکردن لە ژینگەی کوردستان و زیادکردنی ڕێژەی سەوزایی و هاوسەنگی سروشت بۆ پاراستنی خاک و ئاو، لە پێناو ئاسوودەی و ژیاندروستی هاووڵاتیان، لە هەمانکاتدا، ئەم هەنگاوانە دەبێتە لانەی ئارامی ژیانی گیانلەبەرانی دارستانەکانمان لە هەرێمی کوردستان.