وادەی دابەشکردنی مووچە راگەيەندرا

SNN-عەلی حەمە سەعید
بەوتەی بەرپرسانی وەزارەتی دارایی و ئابووری حكومەتی هەرێم ئامادەكارییەكانی دابەشكردنی مووچەی مانگی تەموز كۆتایی هاتوون، لەلایەن وەزارەتەكانەوە لیستی مووچە ئاراستەی گەنجینەكان كراوە و لەوێش وردبینی بۆ ليستەكان كراوە، لە سەرەتای هەفتەی داهاتوو دەستبەدابەشكردنی مووچە دەكرێت.

بەگوێرەی زانیارییەكانی SNN كە لەوەزارەتی دارایی و ئابووری وەریگرتوون ئەوە خراوەتەڕوو، وەك ئامادەكارییەك بۆ دەستكردن بە دابەشكردنی مووچەی مانگی تەمووز، لە دوێنێوە لیستی مووچەی فەرمانبەران لەلایەن وەزارەت و دەستەكانەوە ئاراستەی گەنجینەكان كراوە بەمەبەستی وردبینیكردنی ئەو لیستانە و پاشان دەستكردن بە دابەشكردنی مووچەی ئەم مانگە.

ئاماژەی بەوەشكرد: هەموو ئەگەرەكان ئەوەن كە لەسەرەتای هەفتەی داهاتوو بە دیاریكراوی ڕۆژی دووشەممە 25/7/2022 دەستبكرێت بەدابەشكردنی مووچە و یەكەم وەزارەتیش كە مووچە وەردەگرن وەزارەتی تەندروستی دەبێت، پاشان بە هەمان خشتەی مانگی پێشوو مووچەی وەزارەتەكانی دیكەش دابەشدەكرێت.

لە زانیارییەكانی SNN ئەوەش هاتووە: كە وەزارەتی دارایی بەردەوامە لە كۆكردنەوەی داهاتی ناوخۆ و داهاتی خاڵە سنورییەكان و هاوكات لەلایەن وەزارەتی سامانە سروشتییەكانیشەوە پارەی فرۆشتنی بەشێك لە داهاتی نەوتی بۆ ڕەوانەكراوە و تاكۆتایی مانگ بەشێكی دیكەش ڕەوانەدەكات.