“دەبێت حكومەتی هەرێم و عێراق رێكاری پێویست بگرنەبەر بۆ پاراستنی گەشتیاران”
ئەمەل جەلال، سەرۆكی دەستەی گشتی گەشتوگوزاری هەرێم | فۆتۆ: KRG
SNN-عەلی حەمە سەعید
سەرۆكی دەستەی گشتی گەشتوگوزاری هەرێم رایدهگهیهنێت، هێرشهكەی توركیا بۆ سەر ناوچە گەشتیارییەكانی هەرێمی كوردستان كاریگەری زۆر خراپ بەجێدەهێڵێت، دهشڵێت: ” دەبێت هەردوو حكومەتی هەرێم و حكومەتی عێراقی رێكاری پێویست بگرنەبەر بۆ پاراستنی گیانی گەشتیاران”.
ئەمەل جەلال، سەرۆكی دەستەی گشتی گەشتوگوزاری هەرێم ئهمڕۆ ههینى 22ى تهمموز، بە SNNی راگەیاند، “ئەوەی لە ناوچەی گەشتیاری پەرخ لە سنووری زاخۆ روویدا لە دڵەوە رایچڵەكاندم، بۆیە پێویستە سنوورێك بۆ ئەم كارە دابنرێت، بۆ ئەو مەبەستەش دەبێت حكومەتی عێراق و حكومەتی هەرێم لێكۆڵینەوە و رێكاری پێویست بگرنەبەر بهمهبهستى پاراستنی گیانی هاووڵاتییان و گەشتیاران لە هەرێمی كوردستان تاوهكو هێرشە مووشەكییەكانی وڵاتی توركیا بۆسەر هەرێمی كوردستان، دووبارەنەبنەوە”.
لهبارهى كاریگهریی رووداوهكه لهسهر كهرتى گهشتیارى ههرێم سەرۆكی دەستەی گشتی گەشتوگوزاری هەرێم ئهوهشى خستهڕوو، “ئەوەی توركیا ئەنجامیدا لە هێرشكردنەسەر ناوچەیەكی گەشتیاری كارێكی تاوانكارییە و كاریگەری خراپیش دەكاتە سەر ناوبانگی شوێنە گەشتیارییەكانی هەرێمی كوردستان و دروستكردنی دڵەڕاوكێ لای گەشتیاران، بۆیە دەبێت هەردوو حكومەتی هەرێم و عێراق هەوڵەكانییان بخەنەگەڕ بۆ كۆتایی هێنان بەم دۆخە نەخوازراوە”.
سەرۆكی دەستەی گشتی گەشتوگوزاری هەرێم ئەوەشی خستەڕوو، “درووستبوونی ئەم دۆخە نەخوازراوه و بەردەوامیدان بەم دەستدێژیانە بۆ سەر سەروەری خاكی عێراق و هەرێمی كوردستان دەبێتە مایەی شێواندنی ئاسایشی نیشتیمانی و كۆمەڵایەتی هەرێمی كوردستان و دەبێت سنوورێكی بۆ دابندریت و گەشتیاران و هاووڵاتییانیش دڵنیابن لە پاراستنی ژیانیان لەكاتی سەردانیكردنیان بۆ جێگا گەشتیارییەكانی هەرێمی كوردستان”.
