پێشمەرگە و سوپای عێراق ئۆپراسیۆنێکی هاوبەش ئەنجام دەدەن

SNN

تەحسین خەفاجی، وتەبێژی فەرماندەیی ئۆپەراسیۆنە هاوبەشەکانی عێراق لە لێدوانێکی رۆژنامەوانیدا رایگەیاند: “کۆتایی هەفتەی رابردوو قۆناغی پێنجەمی ئۆپەراسیۆنی ئیرادەی پتەو-یان دەستپێکردووە و زیاتر لە چەند مانگێک بەردەوام دەبێت.”

ئاماژەی بەوەشکرد، لەنێوان فەرماندەکانی پێشمەرگە و سوپای عێراق پلان بۆ ئۆپەراسیۆنەکە دانراوە، بە ئامانجی کێوماڵکردنی ناوچەکانی نێوان سوپای عێراق و پێشمەرگەیە لە سنووری دیالە و خورماتوو.

خەفاجی وتیشی “هێزەکانی عێراق و پێشمەرگە گەیشتوونەتە خاڵی تەماس و ئەوەش ئامانجێکی گرنگی هەردوولایە، بۆ کۆنتڕۆڵکردنی ئەو ناوچانەی داعش وەک بۆشایی ئەمنی بەکاریدەهێنان، پێشمەرگە و سوپای عێراق زیاتر لە ساڵێکە هەوڵەکانیان خستووەتەگەڕ و چەندین کۆبوونەوەیان کردووە، تا گەیشتوونەتە ئەو قۆناغەی ئێستا کە متمانە لەنێوانیاندا بونیاتنراوە بۆ بەگەڕخستنی هەوڵی هاوبەش و پێدانی پەیامێکی هاوبەش بە تیرۆریستان، لە پێناو پاراستنی خاکی عێراق.