تورکیا لە شەش ساڵدا نزیکەی 100 هاووڵاتی مەدەنی هەرێمی شەهید کردووە
بۆردومانی فرۆکەکانی تورکیا
SNN
تیمی کوردستانی عێراقی سی پی تی بە هاوبەشی لەگەڵ هاوپەیمانیەتی نێودەوڵەتی کۆمەڵگای مەدەنی لێكۆڵینەوەیەكی بنكۆڵكاری لەسەر ھێرشەكانی سوپای سەربازی توركیا لە نێوان ساڵانی 2015 بۆ 2021 بڵاودەكاتەوە.
بەپێی لێکۆڵینەوەکە لە ئابی 2015ەوە تا کانوونی یەکەمی 2021 تورکیا زیاتر لە 4 هەزار هێرشی ئاسمانی و تۆپهاوێژ و زەمینی کردووەتە سەر هەرێمی کوردستان.
ئەوەش خراوەتەڕوو کە لەو ماوەیەدا 98 بۆ 123 هاووڵاتی مەدەنی بە هۆی هێرشەکانەوە شەهید بوون و 134 بۆ 161 هاووڵاتیش برینداربوون.
روونیشیکردووەتەوە لەو ژمارەیە 55 هاووڵاتی لە کاتی جوتیاری یا خود لەوەڕاندنی ئاژەڵەکانیاندا شەهیدبوون.
هەر وەک باسی لەوەشکردووە، 87٪ی قوربانیان لە رەگەزی نێرن، 13٪ لە رەگەزی مێن و لانیکەم شەش لە شەهیدەکان منداڵن.
بەگوێرەی ئەو لێکۆڵینەوەیە تورکیا بە بەکارهێنانی ئەو چەکانەی لەلایەن ئەمریکا، ئیتاڵیا و ئیسپانیاوە پێیدەدرێت هاووڵاتیانی مەدەنی بەئامانج دەگرێت و لەو رووەشەوە روونیکردووەتەوە کە لە نێوان ساڵانی 2015 بۆ 2020 ئیتاڵیا 57 هەلیکۆپتەری سەربازی A-129C Mangustaی بە توركیا فرۆشتووە و لە زۆرینەی هێرشەکاندا بۆ سەر هاووڵاتیانی مەدەنی ئەو جۆرە هەلیکۆپتەرە بەکارهێنراوە.
