بەشدار حەسەن: زیاتر لە هەفتەیەکە چارەنووسی شێروان شێروانی نادیارە

SNN-عەلی حەمەسەعید

سەرۆكی تیمی پارێزەرانی دەستگیركراوانی بادینان رایدەگەیەنێت، ماوەی زیاد لە هەفتەیەكە چارەنوسی (شێروان شێروانی) كە یەكێكە لەدەستگیركراوانی بادینان نادیارە كسوكارەكەشی هیچ زانیارییەكیان نییە لەبارەیەوە، ئەوەش دوای ئەوەی لە هاوڕێكانی جیاكراوەتەوە، ڕێگەش بە ئێمەی پارێزەران نادرێت سەردانی زیندان بكەین و بەدواداچوون بۆ بارودۆخیان بكەین.

بەشدار حەسەن، سەرۆكی تیمی پارێزەرانی دەستگیركراوانی بادینان بە SNN-ی ڕاگەیاند:”ماوەی زیاد لە هەفتەیەكە چارەنوسی (شێروان شێروانی) كە یەكێكە لە دەستگیركراوانی بادینان نادیارەو كەسوكارەكەشی هیچ زانیارییەكیان نییە لەبارەیەوە ،چونكە تەلەفۆنەكەشی داخراوە و ڕێگە بە ئێمەی پارێزەرانیش نادرێت سەردانی چاكسازی گەورانی هەولێر بكەین لەكاتێكدا پێشتر لەگەڵ هاوڕێكانیدا لە یەك ژوور پێكەوە زیندانی كرابوون”.

ئاماژەی بەوەشكرد، بۆ ئەوەی زیاتر فشار بخرێتە سەر دەستگیركراوانی بادینان و لە یەكترییان جیابكەنەوە، هەر جارەو تۆمەتێك بۆ دەستگیركراوانی بادینان دەدۆزرێتەوە، ئەو تۆمەتەشی ئاڕاستەی (شێراوان شێروانی) كراوە ئەوەیە گوایە كە بە تەلەفۆنی بەندكراوێكی دیكە تەلەفۆنی بۆ دەرەوەی زیندان كردووە و پەیوەندی بەكەسانی دیكەوە كردووە، بەڵام ئەوە كارێكی ئاساییە و نابێتە هۆی ئەوەی بەندكراوێك بخرێتە زیندانی تاكەكەسییەوە.

سەرۆكی تیمی پارێزەرانی دەستگیركراوانی بادینان ئەوەشی خستەڕوو، بەهۆی ئەوەی بەڕێوەبەری چاكسازی گەورانی هەولێر ئەفسەرێكی سەر بە هێزەكانی زێرەڤانی پارتییە، داواكارییەكی ئێمە بۆ وەزارەتی كاروكاروباری كۆمەڵایەتی بەرزناكاتەوە كە داوامان كردووە دۆسیەی ئەو دەستگیركراوانەی بادینان لە چاكسازی گەورانی هەولێرەوە بۆ چاكسازی گەورانی سلێمانی بگوازرێتەوە.