نوسینگەی قوباد تاڵەبانی لەسەر ژنە سوتێندراوەکە هاتە دەنگ

‏SNN
بەڕێوەبەرایەتی توندوتیژی دژی ئافرەتان و خێزانی سلێمانی رایگەیاند: دوابەدوای بڵاوبوونەوەی هەواڵی سوتاندنی ژنێک لەشاری کەرکوک و داواکردنی کەسوکارەکەی بۆ بەهاناوەچونیان لەلایەن قوباد تاڵەبانی جێگری سەرۆکوەزیران، لەسەر ڕاسپاردەی بەشی جێندەر لەنوسینگەی بەڕێزیان، تیمێکی ئێشکگر لە نوسینگەی ڕۆژهەڵاتی بەڕێوەبەرایەتیمان بەهانای داواکاری ئەو خێزانە چوون و ووتەکانیان لەو ژنە تاوانلێکراوە وەرگرت کە لەنەخۆشخانەی ئێمێرجینسی سلێمانی چارەسەر وەردەگرێت.

راشیگەیاند: دواتر وتەکانی خرایە بەردەم دادوەری لێکۆڵینەوەی توندوتیژی خێزانی و بڕیاری دەستگیرکردن بۆ ئەو تۆمەتبارە دەرچوو کە نیشتەجێی شاری کەرکوکە.

دەشڵێت “تیمەکەمان و بەڕێوەبەری بەڕێوەبەرایەتیمان دڵنیاییاندا بە خانەوادەکەی کە؛ هەموو هەوڵێکیان دەخەنە گەڕ بەمەبەستی دەستگیرکردنی تۆمەتبارو پشتیوانی کردنی ئەو ژنەی کە سوتێندراوە”.

دوێنێ هەواڵی سوتاندنی ژنێکی تەمەن 21 ساڵ لە شاری کەرکوک لەلایەن خەسویەوە بڵاوبویەوە، کەسوکاری ئەو ژنە قسەیان بۆ میدیاکان کرد و وتیان “کچەکەمان لە %80ی جەستەی سوتاوە و دەڵێت خەسوم و هاوسەرەکەم تۆمەتباری رووداوەکەن”.