سبەینێ 12 پەرلەمانتاری کوردستان دەست لەکاردەکێشنەوە

عەلی حەمەسەعید-SNN

سبەی یەک شەممە کۆتا ڕۆژی ماوەی یاسایی خولی ئێستای پەرلەمانی کوردستانە، تا ئێستا فراکسیۆنی یەکگرتوو بەفەرمی نامەی دەست لەکارکێشانەوەیان ئاراستەی پەرلەمان کردووە، هاوکات سبەینێش 12پەرلەمانتار لە فراکسیۆنەکانی کۆمەڵی دادگەری گۆڕان و سەربەخۆکان نامەی دەستلەکارکێشانەوە ئاراستەی دەستەی سەرۆکایەتی پەرلەمان دەکەن.

بەگوێرەی زانیارییەکانی SNNکە لە پەرلەمانتارانی پەرلەمانی کوردستان  وەریگرتوون، سبەی یەک شەممە 6/11/2022کە هاوکاتە لەگەڵ کۆتایی هاتنی ماوەی یاسایی خولی ئێستای پەرلەمانی کوردستان، 12پەرلەمانتار لە فراکسیۆنەکانی کۆمەڵی دادگەری و گۆڕان و سەربەخۆکان، نامەی دەستلەکارکێشانەوە ئاراستەی دەستەی سەرۆکایەتی پەرلەمان دەکەن و لە نامەکەیاندا جەخت لەوەدەکەنەوە کە درێژکردنەوەی تەمەنی خولی ئێستای پەرلەمان پێچەوانەی یاسایەو ئەوان نایانەوێت ببنە بەشێک لەو کارە نایاساییە.

ئاماژە بەوەشکراوە، ئەو پەرلەانتارانەی سبەی نامەی دستلەکارکێشانەوە  پێشکەش دەکەن بریتین لە (عەبدولستار مەجید، ڕوپاک ئەحمەد، بەدرییە ئیسماعیل، عومەر گوڵپی،هەورامان گەچێنەیی، موسلیم عەبدوڵا، عوسمان کانی کوردەیی) لە فراکسیۆنی کۆمەڵی دادگەری،هەروەها (عەلی حەمەساڵح، شیرین ئەمین، ئاشنا عەبدوڵا، دابان محەمەد) لە فراکسیۆنی گۆڕان، هاوکات پەرلەمانتار( دیاری ئەنوەر)یش وەک پەرلەمانتاری سەربەخۆ نامەی دەست لەکارکێشانەوە ئاراستەی دەستەی سەرۆکایەتی پەرلەمان دەکەن.

دەست لەکارکێشانەوەی ئەو پەرلەمانتارانە لەکاتێکدایە کە لە چەند ڕۆژی ڕابردوودا فڕاکسیۆنی یەکگرتووی ئیسلامی بەفەری نامەی دەست لەکار کێشانەوەیان ئاراستەی دەستەی سەرۆکایەتی پەرلەمان کرد،هاوکات پەرلەمانتارانی نەوەی نوێش بانگەشەی ئەوە دەکەن کە لەدوای 6/11/2022ناچنەوە دانیشتنەکانی پەرلەمان بەڵام هێشتا نامەی دەستلەکارکێشانەوەیان پێشکەش نەکردووە.