بەهۆی دەستوەردان لەكاروبارەكانی كۆنگرە، 24 ئەندامی كۆنگرەی پارتی بەشداری پرۆسەی دەنگدانیان نەكرد
SNN-عەلی حەمە سەعید
بەهۆی ئەو دەستوەردانەی لە لایەن بەرپرسانی باڵای پارتی ئەنجامدراوە داوایان لە ئەندامانی كۆنگرە كردووە كە دەنگ بەچەند كەسیكی دیاریكراو بدەن، 24 ئەندامی كۆنگرە ئامادەنەبوون بەشداری پرۆسەی دەنگدان بكەن بۆ هەڵبژاردنی ئەندامانی كۆمیتەی ناوەندی، هاوكات دەرچوونی هەندێك بەرپرسی یەكلایی بووەتەوە و دەنگدان وەك سیناریۆیەك ئەنجامدەدرێت.
بەگوێرەی زانیارییەكانی SNN دوای ئەوەی ئەمڕۆ جارێكی دیكە لیژنەی باڵای كۆنگرەی 14ی پارتی بڕیاریاراندا دووبارە دەنگبدەنەوە بۆ هەڵبژاردنی ئەندامانی كۆنگرە ئەوەش دوای ئەوەی شكستیان هێنا لە دەنگدانی ئەلیكترۆنی، بەڵام 24 ئەندامی كۆنگرە هۆڵی دەنگدانی كۆنگرەكەیان جێهێشتووە و ئامادە نەبوون بەشداری پرۆسەی دەنگدان بكەن.
ئاماژە بەوەشكراوە، هۆكاری بەشدارینەكردنی ئەوئەندامانەی كۆنگرە بۆ دەنگدان بە ئەندامانی كۆمیتەی ناوەندی لەدوای ئەوەدێت كە هەندێك لە ئەندامانی لیژنەی بالای كۆنگرەی پارتی بە ئارەزووی خۆیان دەستوەردانیان كردووە لە پرۆسەی دەنگدانەكە وبەئاشكرا بە ئەندامی كۆنگرەیان وتووە كە دەبێت دەنگ بە كام بەربژێر بدەن كە زۆرینەیان لەباڵی ( مەسرور بارزانی)ن.
SNN ئەوەشی زانیوە كە لەكۆی هەزار و 56 ئەندامی كۆنگرە كە مافی دەنگدانیان هەبووە هەزار و 32 كەس بەشداری پرۆسەی دەنگدانیانكردووە، ئەوانەشی كە بەشداری پرۆسەكەیانكردووە گومانیان هەیە لەوەی كە ئەودەنگەی داویانە بە بەربژێرەكان دەستكاری نەكرێت، چونكە بەبیانووی زۆری دەنگدەرانەوە ماوەی 13 كاتژمێر دیاریكراوە بۆ جیاكردنەوەی دەنگەكان، لەوماوە زۆرەشدا ئەگەری دەستكاری دەنگەكان لە بەرژەوەندی باڵەكانی ناوپارتی هەیە.
