شەپۆلێكی باران بارین هەرێمی كوردستان دەگرێتەوە چەند ڕۆژێك بەردەوام دەبێت

SNN-عەلی حەمەسەعید
شارەزایەكی بواری كەشناسی و بومەلەرزەزانی ئاماژە بەوەدەكات بەگوێرەی پێشبینییە كەشناسییەكان لە دوانیوەڕۆی ڕۆژی چوارشەممەوە شەپۆلێكی باران بارین و هەورەبروسكە هەرێمی كوردستان دەگرێتەوە و پلەكانی گەرماش زیاتر ڕوو لەدابەزین دەكەن، هاوكات ئەو شەپۆلی باران بارینە تا ڕۆژی هەینی بەردەوامی دەبێت.

پشتیوان ئیبراهیم، شارەزا لە بواری كەشناسی و بومەلەرزەزانی بە SNNی ڕاگەیاند: بەگوێرەی ئەو پێشبینیە كەشناسییانەی كە لەبەردەستماندان لە دوای نیوەڕۆ بۆ ئیوارەی ڕۆژی چوارشەممە 16/11/2022 شەپۆلێكی باران بارین سەرجەم ناوچەكانی هەرێمی كوردستان دەگرێتەوە كە سەرچاوەی ئەو شەپۆلە لە دەریای سوور و دەریای ناوەڕاستەوە سەرچاوە دەگرێت.

ئاماژەی بەوەشكرد، ئەو شەپۆلی بارانبارینەی كە لە ڕۆژی چوار شەممەی ئەم هەفتەیەوە دەستپێدەكات بۆماوەی سێ‌ ڕۆژ و بەردەوامی دەبێت و لەڕۆژی هەینی 18/11/2022 كاریگەری ئەو شەپۆلە بارانبارینە بەرەولاوازی دەچێت، هاوكات هەر بە هۆی ئەو شەپۆلە باران بارینەوە پلەكانی گەرما زیاتر بەرەو دابەزیندەچن.

ئەو شارەزایەی بواری كەشناسی و بومەلەرزەزانی ئەوەشی خستەڕوو، ئەو شەپۆلی بارانبارینە لەهەندێك ناوچە هەورەگرمە و هەورەبروسكەشی لەگەڵ دەبێت، هاوكات  ڕێژەی باران بارین بەپێی ناوچەكان جیاوازە لە ناوچە شاخاوییەكان ڕێژەكە زیاترە و لەناوچە دەشتایی و ناوسەنتەری شارەكان ڕێژەی بارانبارینەكە گۆڕانكاری بەسەردا دێت.