وەزارەتی سامانە سروشتییەکان: لە دابەشکردنی نەوت بەردەوام دەبین

فەرمانگەی میدیاو زانیاری حکومەتی هەرێمی کوردستان رایگەیاند، وەزارەتی سامانە سروشتییەکان تاوەکو ٧ی کانوونی یەکەم، ٣٣ ملیۆن و ٩٨٣ هەزار ٨٠٠ لیتر نەوتی سپی لە سەرانسەری هەرێمی کوردستان، دابەشکردووە.

‎بە پێی دوایین ئاماری وەبەرهێنانی کانزایی وەزارەتی سامانە سرووشتییەکان، تاوەکو ئێستا ١٦٩ هەزار و ٩١٩ خێزان لە پرۆسەی دابەشکردنی نەوتی سپی سوودمەندبوون و پرۆسەکەش بەردەوام دەبێت:

‎ هەولێر: ٨ ملیۆن ٤٥٤ هەزار و ٤٠٠ لیتر نەوتی سپی دابەشکراوە و ٤٢ هەزار و ٢٧٢ خێزان، سوودمەندبوون.

‎ دهۆک: ١٠ ملیۆن و ٦٩٧ هەزار و ٦٠٠ لیتر نەوتی سپی دابەشکراوە و ٥٣ هەزار و ٤٨٨ خێزان، سوودمەندبوون.

‎ سلێمانی و هەڵەبجە: ١٤ ملیۆن و ٨٣١ هەزار و ٨٠٠ لیتر نەوتی سپی دابەشکراوە و ٧٤ هەزار و ١٥٩ خێزان، سوودمەندبوون.

‎فەرمانگەکە ئاماژەی بەوەشکردووە، حکومەتی هەرێمی کوردستان، بڕی ٧٠ ملیار دینار بۆ کڕینی نەوتی سپی، تەرخانکردووە و بەشێوەی تەندەر ٣٢٠ هەزار بەرمیلی بە نرخی ٢٨٤ هەزار دینار بۆ هەر بەرمیلێک دابینکردووە. هەروەها پاڵپشتیی حکومەت بۆ هەر نرخی بەرمیلێک دەگاتە ٦٥% و هاووڵاتییان تەنیا لە ٣٥% نرخەکەی دەدەن.